Беларусийн удирдагч Александр Лукашенко Хойд Солонгост айлчилж магадгүй талаар таамаглал хэвлэлээр гарах болжээ. Тодруулбал, Лукашенког долоо дахь удаагаа ерөнхийлөгчөөр сонгогдсоны дараа Хойд Солонгосын удирдагч Ким Жон Ун түүнд баяр хүргэсэн мессеж илгээсэн. Энэ нь Беларусь болон Хойд Солонгосын харилцаа гүнзгийрч буйн нэг шинж тэмдэг гэж ажиглагчид үзэхийн зэрэгцээ Лукашенког Умардад айлчилж магадгүй гэж таамаглажээ.

Харин Сөүл дахь Беларусийн Элчин сайд Андрей Чернецкий энэ талаар мэдээлэхдээ "Манай ерөнхийлөгч Хойд Солонгосын удирдагчтай уулзах бодолтой байгаа гэж би сонсоогүй. Гэхдээ Трампийг Ким Жон Унтай уулзах гэж буйг хэвлэлээс мэдсэн. Өнгөрсөн жилээс эхлэн нөхцөл байдал нь ноцтойгоор хурцадсан Солонгосын хойгт АНУ-ын ерөнхийлөгч эерэгээр нөлөөлж чадна гэдэгт би итгэлтэй байна. Трамп зарим маргаантай асуудлыг шийдвэрлэхэд тусална" гэжээ.

Өмнөдийн аюулгүй байдалд заналхийлж болзошгүй Беларусь, Хойд Солонгос хоорондын эдийн засаг, цэргийн хамтын ажиллагааны талаар түүнээс асуухад "Элчин сайдын яаманд тийм хамтын ажиллагааны тухай мэдээлэл алга" гэжээ. Мөн "Беларусь улс тэдний дотоод асуудалд оролцохгүй. Гэхдээ Умард болон Өмнөдийн хооронд энх тайван, харилцан ойлголцлыг бэхжүүлэхийн төлөө байна. Солонгосын хуваагдал бол байж болохгүй зүйл. Зарим улс орон хоёр Солонгосыг хуваагдмал хэвээр байлгах гэж шахаж байна. Хэрвээ Өмнөд Солонгос хамтран ажиллахыг хүсвэл Беларусь улс яриа хэлэлцээнд үргэлж нээлттэй.

Дэлхий ертөнц одоо АНУ-тай нэгдсэн, нэгдээгүй буюу зөв, буруу гээд хоёр хуваагдчихаад байна. АНУ-тай нэгдээгүй буюу буруу тал нь Хятад, Орос болчихоод байна. Гэтэл яг үнэндээ аль тал нь зөв, аль тал нь бурууг мэдэхгүй шүү дээ" гэжээ.

Беларусь улс Орос, Хятадаас эдийн засгийн хувьд улам хараат болж байгаа. Үүнтэй холбоотойгоор Өмнөд Солонгосын компаниудад ямар эрсдэл тулгарч байгаа талаар түүнээс асуухад "Өмнөд Солонгосын бизнес эрхлэгчдийн Беларусь дахь хөрөнгө оруулалт тогтвортой хэвээр байгаа. Бид Беларусийн бүтээгдэхүүнийг эрэлт хэрэгцээтэй, өрсөлдөх чадвартай бүс нутагт нийлүүлж байна. Үүнд Латин Америк, Европ, Ази зэрэг орно. Өнгөрсөн жилийн экспорт, тэр дундаа Өмнөд Солонгос руу экспортыг харахад өсөлттэй дүн үзүүлсэн. Геополитикт хэт найдах нь компаниудыг дампууралд хүргэж болзошгүй. Өмнөд Солонгосын компаниуд зах зээлийн оршин тогтнох чадвар эсвэл геополитикийн нөхцөл байдлаас үл хамааран хамгийн ашигтай үйл ажиллагааны чиглэлээ тодорхойлох ёстой" гэв.