Конго улсад өнгөрсөн долоо хоногт Гома хотын шоронгийн эрэгтэй хоригдлууд оргохын тулд гал тавьжээ. Улмаар эмх замбараагүй байдал үүсч, 150 гаруй эмэгтэй хоригдол хүчирхийлүүлж, шатсан болохыг НҮБ-ын хэвлэлийн төлөөлөгч мэдэгдэв.  Тодруулбал, НҮБ-ын Хүний эрхийн албаны төлөөлөгч Сейф Маганго "CNN"-д хэлэхдээ, оргож байсан эрэгтэй хоригдлуудад хүчирхийлүүлсэн нийт 165 эмэгтэй хориглолын ихэнх нь галд нас барсан гэв. Мөн тус улсын шүүхийн албан тушаалтны мэдээлснээр, галаас амьд гарсан 13 эмэгтэй хоригдол мөн адил хүчирхийлүүлсэн байсан гэдгийг Маганго онцлон тэмдэглэсэн юм. Конгогийн шүүхийн албан ёсны тайланг НҮБ-ын Хүний эрхийн агентлаг бие даан шалгаагүй ч өгсөн мэдээлэлд нь итгэлтэй байгаа аж.

Тухайн эрэгтэй хоригдлууд нэгдүгээр сарын 27-ны өдөр "M23" босогчдын холбоо Конгогийн хүчнийхэнтэй Гома хотын эрх мэдлийн төлөө тулалдаж байх үеийг далимдуулж, оргохоор төлөвлөсөн байжээ.

4000 гаруй эрэгтэй хоригдол тухайн үед Музензе шоронгоос оргосон гэж албаныхан орон нутгийн Окапи радиод мэдээлсэн байна. Одоо тус шоронгийн байгууламжид балгаснаас өөр юу ч байхгүй, бүхэлдээ хоосорчээ. Конгогийн харилцаа холбооны сайд Патрик Муяаяа 165 эмэгтэй хохирсон болохыг баталж, "Засгийн газар энэхүү зэрлэг гэмт хэргийг хүчтэйгээр буруутгаж байна" гэж CNN-д мэдэгдэв. Олон арван жилийн турш Конгод мөргөлдөөн гарч байгаа нь энэ мэт бэлгийн хүчирхийлэл, олон нийтийг хамруулсан аллага болоход нөлөөлдөг аж.

Түүнчлэн, Конгогийн хүчнийхэн хүчирхийлэл үйлдсэн гэх өөр нэг мэдээллийг НҮБ-ын Хүний эрхийн агентлаг Баасан гаригт хүлээж авснаа мэдэгдлээ.

Тус агентлагийн дээд комиссарын газрын хэвлэлийн төлөөлөгч Жереми Лоуренс хэлэхдээ,  "Өмнөд Кивуд 52 эмэгтэйг Конгогийн цэргүүд хүчиндсэн гэх мэдээллийг бид шалгаж байна, тэр дундаа бүлэглэн хүчирхийлсэн гэх мэдээлэл байна" гэжээ. Энэ долоо хоногт Гома хотыг эзэлсэн гэж мэдэгдсэн босогчдын "M23" бүлэглэл засгийн газрын хүчнийхэнтэй мөргөлдсөнөө болж 3000 орчим хүн амь үрэгдсэний дараа нэн даруй хүмүүнлэгийн гал зогсоохыг уриалаад байна.