ОХУ-ын сансрын "Роскосмос" агентлагийн дарга Юрий Борисовыг албан тушаалаас нь түдгэлзүүлсэн талаар Кремль Пүрэв гаригт мэдэгдлээ. Гэхдээ тодорхой шалтгаан дурдаагүй байна.

Юрий Борисов 2022 оны долдугаар сараа хойш агентлагийг тэргүүлжээ. Түүний албан тушаалын хугацаанд ОХУ 47 жилийн дараа анх удаа сар луу нислэг үйлдсэн ч амжилтгүй болсон. Бүтэлгүйтлийг үл харгалзан ОХУ тойрог замд сансрын станцаа хөөргөхөөр бэлдэж байгаа бөгөөд Борисов энэ хүрээнд ирэх жилүүдийн амбицтай төлөвлөгөөг ч танилцуулж байв. Тухайлбал, шинэ станцын эхний хоёр модулийг 2027 онд хөөргөх хуваарийг Борисов өнгөрсөн жил баталсан. Энэ нь Орос, Украины дайны улмаас зогсонги байдалд орсон Олон улсын сансрын станцыг орлохуйц төсөл байх юм.

Борисов өмнө нь Сергей Шойгугийн үед Батлан хамгаалахын дэд сайд байсан аж.

Түүний албан тушаалыг Тээврийн дэд сайд Дмитрий Баканов хүлээж авчээ. Баканов засгийн газрын албан тушаалтан болохоосоо өмнө хиймэл дагуулын "Gonets" гэх компанитай байсан. "Gonets" нь АНУ-ын Старлинктэй төстэй хиймэл дагуулын системийг ажиллуулдаг компани бөгөөд гол төлөв засгийн газрын үйл ажиллагаанд оролцдог байжээ.