Нийслэлийн авто замын ачаалал хэдийнэ гурав дахин нэмэгдэж бид түгжрэлд өдрийн ихэнх цагийг өнгөрүүлж байна. Нийслэлд өнөөдрийн байдлаар 830 гаруй мянган тээврийн хэрэгсэл хөдөлгөөнд оролцдог гэсэн судалгаа бий. Үе, үеийн хотын дарга нар, Засгийн газар авто замын түгжрэлийг бууруулах өчнөөн ажил санаачилж хэрэгжүүлдэг ч төдийлөн үр дүнгээ өгсөн нь үгүй. Тэгвэл түгжрэлийг бууруулж, утааг багасгаж нэг сумаар хоёр туулай буудах зорилго бүхий ажил санаачилсан. Тодруулбал, өнгөрсөн онд НИТХ-ын тогтоолоор хотод олгох тээврийн хэрэгслийн улсын бүртгэлийн дугаарын дээд хязгаарыг 730 мянга байхаар тогтоосон.

Энэ хүрээнд 2024 оны арваннэгдүгээр сарын 8-наас эхлэн импортоор оруулж ирж буй автомашинд улсын дугаар олгохдоо тодорхой шалгуур тавьж олгодог болов.

Өөрөөр хэлбэл,  иргэд цахимаар дугаар авах хүсэлтээ явуулж шалгуур хангасан иргэд машиндаа дугаар авах юм. Ингэхдээ И-Монголиа дан системээр нэвтэрч дугаар авах тээврийн хэрэгслийн арлын дугаарыг оруулснаар тодорхой шалгуураар тээврийн хэрэгслийг 100 хүртэл оноогоор үнэлж, эрэмбэлэх юм. Энэ эрэмбээр улсын дугаар олгох дээд тоонд барьж, улсын дугаарыг олгоно. Хамгийн чухал нь иргэд улсын болон олон улсын чанартай авто зам ашигласан төлбөр болон Улаанбаатар хотоос орсон, гарсан ямар нэг өр төлбөргүй байх ёстой гэсэн үндсэн шалгуурыг биелүүлэх хэрэгтэй.

Тухайлбал, сүүлийн жилүүдэд үйлдвэрлэсэн автомашин, цахилгаан автомашин болон зөв хүрдтэй автомашинууд хамгийн өндөр оноог авах юм. Хамгийн өндөр оноотой байгаа тээврийн хэрэгсэлд суларсан дугаарыг олгох боломжтойг илэрхийлсэн мэдээллийг бүтгэлтэй утасны дугаарт илгээхюм.

Уг журам хэрэгжиж эхэлснээр автозамын түгжрэл болоод утааг тодорхой хэмжээгээр бууруулна гэж тооцоолсон. Гэвч энэхүү шийдвэр нь иргэдэд чирэгдэл учруулахаас гадна дугаарын наймаа цэцэглэх боломжийг бүрдүүлж байгаа юм. Учир нь журам хэрэгжиж эхэлснээс хойш фэйсбүүкээр авто машины дугаар авна, зарна гэх зар мэдээлэл хөврөх болов. Өөрөөр хэлбэл, сошиал хуудсаар болон шаглаж зарах дугаарын үнэ тэнгэрт хадаж эхэлжээ.

Өнөөдрийн байдлаар авто машины дугаар 500,000-2,000,000 хүртэлх төгрөгийн ханштай байгаа юм.

Энэхүү журам хэрэгжиж эхлэхээс өмнө иргэд машиндаа дугаар авахдаа 30 минутыг, дугаар  хэвлэлтийн мөнгөнд 30 гаруй мянган төгрөг зарцуулдаг байв. Үүнээс харахад төрийн оролцсон бүхэн энгийн  иргэдэд төвөг болж аливааг өмнөхөөс нь улам дордуулж байгааг харж болох юм.