УИХ-ын намрын чуулганыг таслалтаараа тэргүүлж, Ёс зүй дэгийн байнгын хорооноос сануулга авсан УИХ-ын гишүүн Х.Баттулга булганчуудыг хуралд нь суусангуй гэж үг хаяж байна.

Тэрбээр Баянхонгор аймагт “Хөх Монголын хөх туг” уулзалтыг зохион байгуулах үеэрээ энэ тухай гомдоллов. Х.Баттулга “Хэт намчирхаад байна.  Монгол Улсын Ерөнхийлөгч байсан хүн, УИХ-ын гишүүн ирээд иргэдтэй уулзахад аль нам засаглаж байгаа нь хамаагүйгээр бүгд ирээд суугаад сонсох хэрэгтэй байхгүй юу, тэгдэггүй. Сая Булган дээр ирээгүй. Эв нэгдэлтэй байх юм бол олон мянган зовлонгоос гарах боломж бид нарын карманд байгаа юм” гэж гомдоллов.

УИХ-ын намрын чуулган завсарласан даруйд Х.Баттулга “Хөх Монголын хөх туг” уулзалтыг аймаг бүрт хийхээр болж, орон нутгийг зорьсон. Гэвч уулзалтад нь иргэд олноороо оролцохгүй байгаа нь хэлсэн үгнээс нь тодорхой болж байна.

УИХ-ын гишүүн Х.Баттулгын хувьд булганчуудад гомдол тавих эрх байхгүй.  Тэр 2024 оны сонгуульд итгэлийг нь хүлээж УИХ-д сонгогдсон ч намрын чуулганы хугацаанд үндсэн ажлаа хийгээгүй.  УИХ-ын Тамгын газраас гаргадаг ирцийн мэдээгээр 126 гишүүнээс хуралдаанаа хамгийн олон удаа тасалсан нь Х.Баттулга байв.

Жирийн иргэн зургаан сарын хугацаанд түүн шиг ажилдаа хааяадаа үзэгдчихээд хаана юу хийж яваа нь мэдэгдэхгүй алга болсон бол аль хэзээний халагдсан. Гэтэл УИХ-ын гишүүн гэхээрээ дархан эрхтэй цалингаа аваад бас болоогүй уулзалтад ирсэнгүй гэж үг хаяж явна.

Яг үнэндээ бол үндсэн ажлаа хийдэггүй хийдүүлдэг гишүүний уулзалтад сонгогчид очихгүй бойкот хийвэл таарна.

Г.ХОРОЛ