Бичиг баримтгүй 100 орчим цагаач тээвэрлэсэн Америкийн цэргийн нисэх онгоц Лхагва гаригт Энэтхэгийн хойд хэсэгт газарджээ. Зэвсэгт хүчний хангамж, цэрэг тээвэрлэхэд ихэвчлэн ашигладаг С-17 онгоц Пунжаб мужийн Амритсар хотод газардсан. Энэ бол Трампийн цагаачдыг албадан гаргах ажиллагааны нэгээхэн хэсэг юм. Трамп өнгөрсөн сард цэргийнхэнд цагаачлалын хууль сахиулах, хилийн аюулгүй байдлыг хангахыг үүрэгдсэн захирамжид гарын үсэг зурсан.

Энэтхэгийн Элчин сайдын яам энэ талаар дэлгэрэнгүй мэдээлэл өгөөгүй байна. Гэхдээ өнгөрсөн долоо хоногт тус улсын Гадаад хэргийн яамны хэвлэлийн төлөөлөгч "Энэтхэг улс хууль бус шилжилт хөдөлгөөнийг эрс эсэргүүцэж байгаа бөгөөд урсгалыг таслан зогсоохын төлөө хамтран ажиллана" гэжээ.

АНУ-ын Батлан хамгаалахын сайдын үүрэг гүйцэтгэгч асан Роберт Салессес өнгөрсөн сард Батлан хамгаалах яам 5000 гаруй цагаачийг албадан гаргахад цэргийн нисэх онгоцоор хангана гэж мэдэгдсэн юм. Энэ мэдэгдлээс хойш хэд хэдэн онгоц АНУ-ын нутаг дэвсгэрээс ниссэн ч газардах үеэрээ асуудалтай тулгарсан билээ. Тухайлбал, Мексик улс өнгөрсөн сард бичиг баримтгүй цагаачдыг тээвэрлэж явсан АНУ-ын цэргийн нисэх онгоцыг оруулаагүй. Колумбын ерөнхийлөгч Густаво Петро мөн тус улс руу чиглэсэн хоёр цэргийн нислэгийг хүлээн авахаас татгалзсан байна. Гэхдээ тариф, визний хориг зэрэг шалтгааны улмаас Колумб улс хэдхэн хоногийн дараа шийдвэрээ өөрчилжээ.