"Бизнест ээлтэй Монгол" хөтөлбөрийн хүрээнд Зөвшөөрлийн зөвлөлийн өргөтгөсөн хуралдаан өнөөдөр /2025.02.06/ Төрийн ордонд болж байна.

Нийслэлийн Засаг дарга 12 тусгай, дөрвөн энгийн зөвшөөрөл олгож байгаа. Тухайлбал, баар, ресторан, цайны газрын энгийн зөвшөөрөлд ордоггүй. Хугацааны тухайд өргөдөл гаргахад хуульд заасан тусгайлсан шаардлагыг хангасан байна гэдэг. Үүний дараа магадлан шалгах ажиллагааг ажлын 10 хоногт шийдвэрлэдэг гэдгийг албаныхан хэлж байв.

ЗГХЭГ-ын дарга Н.Учрал:

-Хуульд нийцээгүй дүрэм журмуудыг цэгцэлж, хаврын чуулганаар өргөн баригдах гэж байгаа Зөвшөөрлийн тухай хуульд өөрчлөлт оруулах саналыг илгээх албан бичгийг хүргүүлсэн. Одоогоор нэг ч яам, агентлагаас хариу ирээгүй байна. Тийм учраас өнөөдрийн хуралдаанаар асуудлыг хурдлуулж, холбогдох үүргийг өгч, Зөвшөөрлийн зөвлөл шийдвэр гаргахаар зорьж байна. Зөвшөөрлийн хуулийн талаар ерөнхий танилцуулгыг хийе.

Зөвшөөрлийн тухай хуулийг өнгөрсөн парламентад баталсан. Энэ хуулийг батлахад бизнес эрхлэгчид эерэгээр хүлээн авч, зөвшөөрлийн тоог 381 болгож багасгасан. Ингэхдээ хуулийг дагалдуулаад энгийн болон тусгай зөвшөөрлийн жагсаал бий. Үүнээс 251 нь тусгай, 130 нь энгийн зөвшөөрөл байдаг. Үүний дараа хоёр жилийн хугацаанд Зөвшөөрлийн хуулийн жагсаалтад 16 шинэ зөвшөөрөл нэмсэн. Энэ тоо 10 жилийн дараа 160 хүрнэ. Зөвшөөрлийн хууль гарч, төрийн зөвшөөрөл багасна гэсэн чинь эргээд нэмэгдсэн. Одоо энэ хуульд зөвшөөрөл нэмэх бол Зөвшөөрлийн зөвлөлийн хурлаас дүгнэлт авна гэж заасан. Гэтэл огт зөвшөөрөл авалгүйгээр 16 шинэ зөвшөөрөл нэмсэн байна.

Тодруулбал, боловсролын салбарт дөрөв, байгаль орчны салбарт гурав, банк санхүүгийн салбарт хоёр, батлан хамгаалахад хоёр, хөдөө аж ахуйд хоёр, аймаг нийслэлийн Засаг дарга нарт хоёр, шүүх шинжилгээний байгууллагад хоёр зөвшөөрөл олгохоор нэмжээ. Энэ процессыг алгассан гэсэн үг. Цаашдаа энэ "хулгай" үргэлжлэх юм байна. Тиймээс зөвшөөрөл чинь буруушаал болчихоод байна.

Зөвшөөрлийн харилцааг журмаар зохицуулахгүй. Уг хуульд зааснаас бусад тохиолдолд үйл ажиллагаа явуулахыг хуулиар хориглохгүй учраас зөвшөөрөл авахгүйгээр ажиллаж болно гэсэн хуультай. Гэтэл өнөөдөр Зөвшөөрлийн тухай хуульд заасан 1.4.17 дугаар зүйлд зөвшөөрөл олгох, сунгах, түдгэлзүүлэх, хүчингүй болгохтой холбогдсон захиргааны хэм хэмжээ тогтоох акт гаргахыг хориглоно гэж заасан. Нэг ёсондоо 380 зөвшөөрлөөс өөр зөвшөөрлийн шинж чанартай актыг аль нэг сайд, дарга дур мэдэн тогтоохгүй гэж хуульд заасан байхад тушаал, журмаар давхар зохицуулж байна. Нийт 33 давхардсан хэм хэмжээ тогтоосон акт үйлчилж байна. Үүнд дээр 89 эрх бүхий байгууллагаас баталсан журам буюу хуульд заагаагүй мөртлөө сайд зөвшөөрлийн шинж чанартай тушаал гаргачихсан. Нэг ёсондоо 251 тусгай зөвшөөрлөөс 89 нь хууль давсан журам хүчин төгөлдөр мөрдөгдөж байна.

Жишээлбэл, нийслэлийн нутаг дэвсгэрт худалдаа үйлчилгээ эрхлэх нийтлэг журам гэж бий. Бид бүртгэл нэртэй зөвшөөрөлтэй болсон. Зөвшөөрлийн хуульд энэ заалтыг хатуу заачихаад байхад нийслэл дээр гэхэд ХЗДХЯ-наас захиргааны хэм хэмжээний бүртгэлгүй гэж үзэн, 2022 оны зургадугаар сарын 21-ний өдөр бүртгэсэн байна. Нийт 151 журам байна. Энэ журмын хүрээнд их дэлгүүр, хүнсний зах, агуулах, супер маркет, мухлаг, хоол үйлчилгээний чиглэлээр ресторан, баар, үсчин, гутал засвар, фитнес гэх мэт. Зөвшөөрлийн хуулиад эдгээр нь зөвшөөрөл авах шаардлагагүй гэж заасан байхад нийслэл өөрсдөө журам гаргасан. Дотроо энэ бүртгэлийг заавал хийлгэ гэж захиргааны хэм хэмжээ тогтоосон. Өнөөдөр энэ асуудлыг ярих цаг болсон. Энэ бүхэн хууль зөрчиж байна уу, үгүй юм уу. Та нар яагаад 145 үйл ажиллагааг бүртгэнэ гээд журамлаж байгаа юм бэ. Зөвшөөрлийг бүртгэл гэж нэрлэсэн. Төрийн хүнд суртлыг бууруулж байна уу. Нийслэл Зөвшөөрлийн хуулийг хэрэгжүүл, журмаа хүчингүй болго гэдэг үүрэг чиглэл өгье.

Бид Зөвшөөрлийн хуулиа баталсан. Цахимаар хүсэлтээ гаргаж, материал бүрдсэн бол болж байгаа шүү дээ. Нийслэл дээр шалгалт багадаагүй. Үүнд зовох хэрэггүй. Зөвшөөрлийн хууль олгох, түдгэлзүүлэх, сунгахыг зохицуулахгүй. Хууль тогтоомжийн хуульд өөрчлөлт хийж, Зөвшөөрлийн зөвлөлөөс дүгнэлт авдаг болъё. Эрх олгосон журмыг дагуулаад дүүргийн мэргэжилтнүүд "гацаа" үүсгэдэг. Дүүргийн нэг мэргэжилтэн орон нутагт даам гарч байна шүү дээ. УИХ дээр баталсан хуулиа гуйвуулж байна. Ер нь хуулийг урдаас биш араас унших ёстой юм билээ. Эрх олгоно гэдэг ганц үг нийгэмд асар их өөрчлөлтийг бий болгож байна.