Нимерикс вакцин халуурах, ядрах шинж тэмдэг үзүүлнэ

Монгол Улсын засгийн газар менингококкийн эсрэг Нимерикс вакциныг АНУ-ын "Пфайзер" компаниас худалдан авахаар ажиллаж байгаа талаар мэдээлсэн. Нимерикс вакцин нь менингококкийн өвчнөөс урьдчилан сэргийлэхэд ашигладаг вакцин юм. Энэ нь хавсарсан вакцин бөгөөд нянгийн полисахаридын капсулыг уураг тээвэрлэгчтэй холбодог, бага насны хүүхдийн дархлааг сайжруулдаг зэрэг ач холбогдолтой. Вакцины нийтлэг нөлөө нь тарьсан хэсэгт өвдөх, халуурах, ядрах зэрэг байдаг аж. ЭМЯ-наас мэдээлснээр, эхний ээлжид худалдан авсан 2000 тун вакциныг ХӨСҮТ дээр нэгдсэн журмаар үнэ төлбөргүй хийх бөгөөд сайн дурын үндсэн дээр хийлгэж байгаа хүмүүсээс тодорхой төлбөр авах юм байна.

2024 оны арванхоёрдугаар сараас энэ оны хоёрдугаар сарын байдлаар улсын хэмжээнд менингококкт халдварын сэжигтэй найман тохиолдол бүртгэгдэж, гурав нь батлагдаж, нэг нь нас барсан юм.

ХӨСҮТ-өөс ойрын хавьтлын 347 хүнийг хими сэргийлэлтэд 24 цагт багтаан хамруулж, хамар залгиурын үзлэг хийсэн.

Нийт 45 хамар залгиурын үрэвсэлтэй хүнийг илрүүлж, эрүүлжүүлсэн ба 78 хүнээс сорьц авч шинжлэн эрсдэлгүйг тогтоосон болохыг албаныхан мэдээлээ. Менингококкт халдварын вакцин нь товлолын дархлаажуулалтад ордоггүй. 1994 оноос таван удаагийн нэмэлт дархлаажуулалт, 2001 оноос сайн дурын дархлаажуулалт хийж эхэлсэн. Нэмэлт дархлаажуулалтад 2-18 насны хүүхдийг хамруулж, хамралтын хувь 90-96 хувьтай байгаа аж.

Менингококкт халдвар нь дөрвөн төрлийн нянгаар үүсгэгддэг цочмог халдварт өвчин бөгөөд шинж тэмдгийн хувьд 38-42 хэм хүртэл гэнэт өндөр халуурах, халууны эмэнд буухгүй байх, богино хугацаанд дахин өндөр халуурах, бие сулрах, дотор муухайрах, бөөлжих, уур уцаартай хэт цочимхой эсвэл ноомой болох, царай цонхийх зэрэг шинж тэмдэг илэрдэг. Цусархаг тууралт нь өвчин эхэлснээс хойш 12 цагийн дотор гарна. Хэрэв өвчин хүнд явцтай байвал үхжилт тууралт 4-6 цагийн дотор гардаг. Маш богино хугацаанд хүндэрч, эндэгдэлд хүргэдэг гэдгийг эмч мэргэжилтнүүд онцолж буй.