Утааны асуудлыг хөндсөн өнөөдрийн/2025.02.04/ хэлэлцүүлэгт УИХ-ын гишүүн Д.Рэгдэл оролцож байр сууриа илэрхийлэх үеэрээ нийслэлийн гэр хороололд амьдарч байгаа 190 мянган өрхийн зуухыг шалгаж, стандарт шаардлага хангахгүй бол солих хэрэгтэй гэж дүрэмдэв.

Энэ талаар тэрбээр “Хэрэглэгчээ төлөвшүүлье. Хэрэглэгч маань ямар ч түлш байсан түлж чаддаг байх ёстой. Өөрөө өөрийнхөө төлөө хариуцлага хүлээгээд чаддаг байх ёстой. Гэтэл “Тавантолгой түлш” компанийнхан гал асаахыг нь зааж өгөөд байх юм. Юу гэсэн үг вэ. Монгол хүн гэртээ гал түлж чадахаа больсон юм уу хаашаа юм.

6000 Ккл-ын дулаантай нүүрсийг шатааж болох зуух 198 мянга дотор хэд байна вэ гэдгийг тогтоох ёстой. Үүний тулд бүх зуухыг шалгах шаардлагатай.

Жишээ нь, Үүрийнтуяагийн зууханд шатаавал болох нь уу, үгүй юу.  Н.Тавинбэх сайдын зууханд шатаавал болох нь уу. Энэний аяыг даахгүй зуухнууд 6000 Ккл дулаантай нүүрсийг дутуу шатаагаад угаартуулаад байгаа юм шүү дээ. Бүх зуухаа үзээд солихыг нь солих хэрэгтэй. Жаахан мөнгө л гаргана биз хамаагүй. Зуух солихгүйгээр  дулааны асуудлыг шийдэхгүй. Зуух, түлш энэ бүхийг зэрэгцүүлж сайжруулан асуудлаа шийднэ шүү дээ” гэв.

Нийслэл энэ онд 32 мянган айлын зуухыг шинэчлэхэд зориулж төсөвтөө 28.2 тэрбум төгрөг тусган, нэг зуухыг 875 мянган төгрөгөөр нийлүүлэхээр тооцоод байв.

Олон нийтийн зүгээс дээрх шийдлийг буруутгаж,  агаарын бохирдолтой тэмцэх хүрээнд өөр арга зам хайж, 28.2 тэрбум төгрөгийг бодитой зүйлд зарцуулахыг хүссэн. Тэр ч дагуу нийслэл 32 мянган зуух нийлүүлэх тендер зарлахаа цуцалсан. Гэвч УИХ-ын гишүүн Д.Рэгдэлийн хувьд “Зуухаа шинэчлэхгүйгээр дулааны асуудлыг шийдэхгүй” гэж нийслэлийнхнийг “тархидав”.

УИХ-ын гишүүн Д.Рэгдэлийн хувьд 2024 оны сонгуульд МАН-аас намын листээр сонгогдон парламентын гишүүн болсон. Шинжлэх ухааны академийг удирдаж байсан эрдэмтэн арай өөр шийдэл ярих болов уу гэтэл өнөөх л зуух, яндан солих үлгэрээ давтсанд олон хүн шүүмжлэлтэй хандаж байна.

Г.ХОРОЛ