Украины зүүн нутаг дахь Оросыг дэмжигч хагас цэрэгжүүлсэн бүлгийн удирдагч Даваа гаригт Москвад болсон дэлбэрэлтэд өртөж, нас баржээ. Тодруулбал, Арбат батальоны дарга Армен Саркисян нь Москвагийн баруун хойд хэсэгт байрлах нэгэн орон сууцны үүдний танхимд болсон дэлбэрэлтэд өртөж, хүнд шархадсан байна. Түүнийг нисдэг тэргээр эмнэлгийн байгууллага руу шилжүүлж, эрчимт эмчилгээнд оруулсан боловч шархаа даалгүй нас барсан болохыг орон нутгийн хэвлэл мэдээлэв. Дэлбэрэлт болох үед Армен бие хамгаалагчийнхаа хамт байжээ. Зарим хэвлэлээр бие хамгаалагч нь шархадсан эсвэл мөн адил нас барсан гэж мэдээлж байгаа тул албан ёсны мэдээлэл гараагүй байгаа юм. Уг хэрэгт Украины Аюулгүй байдлын алба холбоотой гэх хардлага байгаа ч тус албанаас дэлбэрэлтийн талаар ямар нэгэн тайлбар хийгээгүй байна.

Өнгөрсөн арванхоёрдугаар сард Украины Аюулгүй байдлын алба Арменыг гэмт хэргийн ахлагч гэж тодорхойлж байсан. Мөн Украины эсрэг түрэмгийлэлд Оросын өмнөөс хоригдлуудыг дайчилж, фронт руу илгээж байна гэж мэдэгдсэнээс гадна Армен 2014 оноос хойш олон улсад эрэн сурвалжлагдаж байгааг онцолсон юм. Армен мөн Украины оргосон ерөнхийлөгч асан Виктор Януковичийн ойр дотнын хүмүүсийн нэг байсан гэж яригддаг. Улмаар Москвагийн эрх баригчид Армены үхэлд Украин холбоотой гэж буруутгаж байна.

Дэлбэрэлт болсон байрны хажууханд амьдардаг 36 настай Олга Воронова "AFP" агентлагт болсон нөхцөл байдлын талаар хэлэхдээ, "Бид маш өндөр зэрэглэлийн хамгаалалттай. Зочин, гийчин ирэх үед нэвтэрч болох болохгүй гэдгийг хэлдэг. Бас хороололд нэвтэрдэг бүх машиныг харуулууд тэмдэглэж авдаг. Тиймээс яагаад дэлбэрэлт болсныг ойлгохгүй байна. Манай гэр бүл үнэхээр айж байна" гэжээ.

Арбат батальон ОХУ-ын Курск мужид үйл ажиллагаа явуулаад удаж буй. Армен нас барахаас өмнө Оросыг дэмжигч бүлгүүдийн эсрэг хэд хэдэн халдлага гарсан байдаг. Тэнгисийн цэргийн ахлах офицер Валерий Транковский, шоронгийн дарга Сергей Евсюков нар 2024 оны сүүлээр Орост эзлэгдсэн Украины бүс нутагт тэсрэх бөмбөг суурилуулсан машин дэлбэрсний улмаас нас баржээ. Мөн арванхоёрдугаар сард Оросын зэвсэгт хүчний өндөр тушаалын генерал болон түүний туслахыг Москвад Украины аюулгүй байдлын алба хөнөөсөн гэж Украины эх сурвалж "BBC"-д мэдээлсэн байдаг. Тиймээс энэ удаагийн хэрэг мөн адил захиалгат аллага гэж ажиглагчид үзэж байна.