Тайландын түүхэнд байгаагүй хамгийн том романс залилангийн хэрэгт холбогдсон эмэгтэйг Тайландын Хат Яй олон улсын нисэх онгоцны буудлаас баривчилжээ. Тайландын Мөрдөн шалгах төв товчооныхон 52 настай эмэгтэйг Бямба гаригт Малайзын онгоцноос буухад нь баривчилсан аж.

Тэрбээр Афганистанд ажиллаж байсан АНУ-ын армийн эмчийн хуурамч "LinkedIn" хаягийг ашиглан үндэстэн дамнасан компанийн Тайланд дахь салбарын санхүүгийн ахлах захирлыг хууран мэхэлж, компаниас нь 6.3 тэрбум батт буюу 186 сая ам.доллар залилжээ.

Энэ хэрэгтэй холбоотойгоор тухайн захирал болон Тайланд, Нигерийн 100 орчим иргэнийг баривчлах тушаал гарсан байна. Сэжигтэн эмэгтэйн нигер найз залуу нь Тайландад данс нээлгэх боломжгүй байсан тул түүнээс Тайландад данс нээлгэхийг хүссэн гэж мэдэгджээ. Тэд 2017 онд Малайзад танилцсан байна. Ингээд хоёр жил хамт амьдарсны эцэст нигер залуу Тайландад бизнес эрхэлмээр байгаа тул данс нээхийг эмэгтэйгээс хүсчээ.

Тухайн эмэгтэй нь 2022 онд мөн романс залилангийн хэрэгт холбогдож байв. Романс залилангаас гадна нууц нийгэмлэгийн гишүүн, гэмт хэргийн бүлгийн гишүүн, үндэстэн дамнасан гэмт хэргийн байгууллагатай холбоотой, хувийн мэдээллийг хулгайлах замаар залилан мэхлэх гэмт хэрэгт холбогдсон, мөнгө угаах гэмт хэрэгт холбогдсон гэсэн үндэслэлээр тус эмэгтэйг эрэн сурвалжилж байжээ.