Өнгөрсөн бямба, ням гаригуудад
Ард­чилсан намын аймаг, дүүргүүдийн намын хороод дотоод сонгуулиа
явуулж, намын хорооны нийт гишүүдийнхээ 3/1-ийг ротацид оруулан шинээр
сонгосон. Харин одоо аймгуудын намын хороонд шинээр сонгогд­сон
гишүүдийг батламжлах, намын удирдах дээд байгууллага болох ҮЗХ-нд нэр
дэв­шигч­дийг сонгох хурлууд эхлээд байна. Өчигдөр Хэнтий аймгийн
Ардчилсан намын хорооны хурал болж, “Цагаан шонхор холдинг”-ийн
ерөнхийлөгч Ч.Энхтайваныг Ардчилсан намын Гүйцэтгэх зөвлөлд сон­гожээ.
Гүйцэт­гэх зөвлөл гэдэг нь ҮЗХ хуралдахаас бусад үед намын удирдах эрх
мэдлийг хэрэг­жүүлдэг, МАХН-ынхаар бол Удирдах зөвлөл гэсэн үг, 21
гишүүнтэй. Хэнтий аймгаас Ардчилсан намын ҮЗХ-нд сон­гуультай есөн
гишүүний гурвыг нь намын дүрмийн дагуу ротацид оруулснаас Нийс­лэлийн
захираг­чийн орлогч Да.Ганболд, А.Энх-Амгалан нар өрсөлдөгчгүйгээр дахин
сонгогдсон байна. Харин УИХ-ын гишүүн, “молекул” хочит Батж.Батбаярын
хүү Б.Батбилэгийн оронд Хэнтийн Ардчилсан намын хорооны гишүүн
н.Хүдэрбаатар гэдэг залууг ҮЗХ-нд шинээр сонгожээ.

Харин нийслэлийн Баянгол дүүргийн Ардчилсан намын
хорооны сонгууль нэлээд ширүүн болж өнгөрчээ. Тус дүүргээс Ардчил­сан
намын генсек Д.Эрдэнэбат, Иргэний хөдөлгөөний О.Магнай хоёрыг ҮЗХ-нд
шинээр нэр дэвшүүлэхээр болсон байна. Энэ нь Нийслэлийн Ардчилсан намын
дарга С.Эрдэ­нийн УИХ-ын гишүүн Х.Тэмүүжинг тус дүүргээс шахах тактик
болов. Өмнө ч С.Эрдэнэ дарга өөрөө “мөнгө өгдөггүй нөхдүүдийг намаас
шахна” гэдэг үгийг намынхандаа нэг бус удаа хэлж байсан гэдэг. Харин
О.Магнай өмнө нь Сонгинхайрхан дүүргийн Ардчилсан намын хороон дээр
нэрээ дэвшүүлээд унасан. Тиймээс Баянгол дүүргийн Ардчилсан намаас
ҮЗХ-нд дахин нэр дэвшихийн тулд 10 сая төгрөг төлсөн гэх яриа бий.
Нийслэлийн Ардчилсан намын дарга, УИХ-ын гишүүн С.Эрдэнэ саяхан
тойргийнхоо иргэд, сонгогчидтой уулзах үеэрээ “Х.Тэмүү­жин гишүүн
Баянголоос дахиж нэр дэвшихгүй, тойргийнхоо мөнгийг өөр тийш нь
шил­жүүлээд явсан” гэж улаан цайм гөрдсөнөөс үзсэн ч Д.Эрдэнэбатыг
Багануураас шил­жүүлж, О.Магнайн хамт тус дүүргээс ҮЗХ-нд нэр
дэвшүүлэхээр болсон нь цаанаа зорилготой бололтой. Хэрвээ Х.Тэмүүжин
гишүүн дүүргээсээ ҮЗХ-нд сонгогдож чадахгүй бол УИХ-ын сонгуульд энэ
тойр­гоос нэр дэвших эрхгүй болох юм. Дугаар шилжих мөчид Баянгол
дүүргийн Ардчилсан намын хорооны сонгуулийн дүн гарчээ. Намын хорооны
105 гишүүнээс 35 нь Х.Тэмүүжин гишүүний төлөө саналаа өгсөн байна.
Түүнтэй хамт өмнө нь дүүргийн намын дарга байсан н.Батдорж гэгч мөн
ҮЗХ-ноос хасагджээ. Тэдний оронд Ардчилсан намын ерөнхий нарийн бичгийн
дарга Д.Эрдэнэбат, Иргэний хөдөлгөөний О.Маг­най нар ҮЗХ-нд сонгогдсон
байна. Харин Сүхбаатар, Хан-Уул зэрэг нийслэлийн бусад дүүрэг, аймгуудын
Ардчилсан намын хороо­дын хурал ирэх амралтын өдрүүдэд болох юм байна.

Б.ЗАЯА