Ерөнхий сайдын дэргэдэх шуурхай штаб долоо хоног бүрийн амралтын өдөр хуралдаж байгаа. Хоёрдугаар сарын 1-ний хуралдаанаар хотын дарга Х.Нямбаатар нийслэлийн авто замын хөдөлгөөнийг хиймэл оюун ухаант камерын системээр хянахаар болсон бөгөөд түгжрэлээс шалтгаалж гэрлэн дохиог зохицуулах боломж бүрдсэнийг онцоллоо.

Хотын даргын хэлснээр, шуурхай удирдлагын төв дээр нийслэлийн 176 уулзвар, 2600 гол гудамжуудыг нэгдсэн системд холбож дуусаад байна. Камерын нэгдсэн системийн онцлог нь хиймэл оюун ухаан суурилсан программ хангамжтай явж байгаа.

Өдөрт Улаанбаатарт 600 мянга гаруй тээврийн хэрэгсэл хөдөлгөөнд оролцож байгаа бөгөөд тус камерын системд бүхэлдээ хянагдаж, түгжрэлээс шалтгаалж уулзваруудын гэрлэн дохио  хиймэл оюун ухаанаар зохицуулах программ хангамжтай болсон гэдгийг онцолсон.

Нэг уулзвар дээр дунджаар 100 гаруй мянган зөрчил нэг өдөрт бүртгэгдэх тохиолдол гардаг байна. Тиймээс хиймэл оюун ухаанаар зөрчил шалган шийдвэрлэх харилцааг зохицуулах хууль эрх зүйн зохицуулалтыг холбогдох албаныхан гаргаад байгаа аж. Гэхдээ 2026 оны нэгдүгээр сар хүртэл хиймэл оюун ухааны тусламжтай бүртгэгдсэн зөрчлийг тухайн зөрчил гаргагч руу мэдээлж, сануулж, торгууль ногдуулахгүй байхаар төлөвлөжээ. Дэлхийн бусад хотууд хиймэл оюун ухаант систем бүхий камерын хяналтаар зөрчил болоод бусад асуудлыг илрүүлж, иргэдийг хариуцлагжуулдаг туршлагатай аж. Тиймээс энэ зохицуулалт нэг талдаа түгжрэл бууруулах, нөгөө талдаа жолооч нарыг замын хөдөлгөөнд хариуцлагатай оролцоход нөлөөлөх учир иргэд дэмжиж байгаагаа илэрхийлсэн байна.