IJF буюу Олон улсын жүдогийн холбооны энэ оны эхний томоохон тэмцээн болох Парисын Их дуулга өнгөрөгч амралтын өдрүүдээр боллоо. Тус тэмцээнд дөрвөн тивийн 50 орны 298 жүдоч өрсөлдсөн бөгөөд Монгол Улсаа төлөөлөн эрэгтэй тав, эмэгтэй долоон тамирчин өрсөлдөв. Харамсалтай нь медаль авч чадсангүй. Дэлхийн шилдгүүдээс Бельгийн Маттиас Кассе, Италийн Мануэль Ломбардо, Израилийн Инбар Ланир, Косовогийн Дистриа Красники, Гүржийн Лаша Маргвелашвили тэргүүтэй жүдочид барилджээ.

Лос Анжелесын олимпийн цикль эхэлж байгаа гэдэг утгаараа энэ удаагийн Их дуулгад харьцангуй залуу бүрэлдэхүүн оролцсон. Хамгийн ахмад, туршлагатай нь эрэгтэйчүүдийн -66 кг-д барилдсан Г.Хэрлэн байв. Мастерсын алт, мөнгөн медальт тэрбээр хамгийн сүүлд 2024 оны гуравдугаар сард л олон улсын тэмцээнд оролцжээ. Өөрөөр хэлбэл, удаан хугацааны дараа олон улсын татамид гарч барилдав.

Шүүмжлэлтэй хандахад хэсгээсээ шалгарч, дагаж барилдах, хүрэл медалийн төлөө ч өрсөлдсөн хүн байсангүй. Дээрх 12 тамирчин бүгд хэсэгтээ ялагдаж, тэмцээнээ өндөрлүүлжээ. Гэхдээ залуу тамирчдад энэ нь ирээдүйд том сургамж, туршлага болсон нь гарцаагүй.

Багийн дүнгээр эзэн орон Франц улс тэргүүлсэн бол тэдний араас Япон, Өмнөд Солонгос, АНЭУ, Азербайжан тэргүүтэй улсууд удаалжээ. АНЭУ-ын нэр дээрээс барилдаж буй эмэгтэйчүүдийн -52 кг-ын жүдоч Б.Хорлоодой тавдугаар байр эзэлсэн бол эрэгтэйчүүдийн -66 кг-д барилддаг Б.Нармандах хэсгийн шатаа гэтэлсэнгүй.

Дараагийн том тэмцээн болох Бакугийн Их дуулга энэ сарын 14-16-ны өдрүүдэд болно. Тус тэмцээнд Монгол Улсаа төлөөлөн оролцохоор одоогоор таван тамирчин мэдүүлгээ өгчээ.