Газын зурваст 15 сар үргэлжилсэн мөргөлдөөний дараа 2.3 сая оршин суугчийн дийлэнх нь орон гэргүй болоод буй. Тиймээс орон гэргүй болсон палестинчуудыг Египет, Йордан улсууд хүлээж авах ёстой гэж АНУ-ын ерөнхийлөгч Дональд Трамп саяхан мэдэгдсэн. Шүүмжлэгчид энэ саналыг "Үндэстэн ястны цэвэрлэгээ" гэж нэрлэн, буруутгаж байна.

Энэ асуудалтай холбоотойгоор Арабын Гадаад хэргийн сайд нар Бямба гаригт уулзлаа. Каир хотноо болсон уулзалтад Египет, Йордан, Саудын Араб, Катар, Арабын нэгдсэн Эмират, Палестины эрх баригчид, Арабын лигийн Гадаад хэргийн сайд болон бусад албаныхан оролцов.

Тэд палестинчуудыг ямар ч нөхцөлд газар нутгаас нь шилжүүлэхээс татгалзаж байна. Энэ алхам нь бүс нутгийн тогтвортой байдалд заналхийлж, мөргөлдөөнийг дэлгэрүүлэх болно гэв. Цаашилбал, египетчүүд гудамжинд гарч эсэргүүцлээ илэрхийлнэ гэж тус улсын ерөнхийлөгч Абдель Фаттах аль-Сиси мэдэгдлээ.

Трампийн хувьд дээрх мэдэгдлийг хэлэхдээ Египет, Йорданд цэргийн тусламж үзүүлдэг гэсэн санаагаа хавчуулжээ. Тэрбээр "Бид тэдний төлөө маш их зүйл хийдэг. Тэд үүнийг хийх л болно" гэжээ.