АНУ-ын ерөнхийлөгч Дональд Трампийн санаачилсан татварын нэмэгдэл тариф өнөөдрөөс хэрэгжиж эхэлнэ. Цагаан ордны мэдэгдсэнээр, Канад, Мексикийн импортод 25 хувь, Хятадын импортод 10 хувийн татварын нэмэгдэл тарифыг үндсэн татвар дээр нэмнэ.

Гэхдээ Канадын газрын тосны импорт бусад импортоос харьцангуй бага буюу 10 хувийн нэмэгдэл тариф төлөх болсон байна.

Энэ нь хоёрдугаар сарын 18-ны өдрөөс хэрэгжиж эхлэх аж. Ерөнхийлөгч Трамп мөн Европын холбооны импортод нэмэгдэл татвар ногдуулахаар төлөвлөж буйгаа зарлав. Учир нь өнгөрсөн хугацаанд тус холбоо АНУ-д сайн хандаагүй гэж тэрбээр үзэж байна.

Трамп мөн энэ алхам нь АНУ-ын хилээр нэвтэрсэн олон тооны бичиг баримтгүй цагаач болон худалдааны алдагдлаа багасгах зорилготой гэдгээ дахин онцолжээ. Цагаан ордны хэвлэлийн төлөөлөгч Каролине Левитт Баасан гаригт болсон хэвлэлийн бага хурал дээр хэлэхдээ, "Ерөнхийлөгч хэлсэн амлалтдаа хүрч, биелүүлж байна" гэж онцолсон юм.

Сонгуулийн кампанит ажлын үеэр Трамп Хятадад үйлдвэрлэсэн бүтээгдэхүүнд 60 хүртэлх хувийн татвар ногдуулна гэж сүрдүүлсэн байдаг.

Гэсэн хэдий ч Цагаан ордонд буцаж ирсэн эхний өдрөө шууд ямар нэгэн арга хэмжээ аваагүй бөгөөд үүний оронд тариф нэмснээр үүсэх асуудлыг судалж үзэхийг тушаажээ. 2018 оноос хойш АНУ-д ирэх Хятадын импортын тоо буурч байгаа нь Трампийн анхны бүрэн эрхийн хугацаанд тогтоосон хэд хэдэн татварын нэмэгдэлтэй холбоотой гэж эдийн засагчид тайлбарлаж байна.