Филадельфийн зүүн хойд хэсэгт эмнэлгийн тусламж үйлчилгээ үзүүлдэг жижиг тийрэлтэт онгоц осолдож, ойролцоох байшин, барилгууд галд автжээ. "Jet Rescue Air Ambulance"-ийн мэдэгдсэнээр, уг онгоц Баасан гаригт өвчтөн хүүхэд, асран хамгаалагч болон тусламж үйлчилгээ үзүүлж байсан хөлгийн багийн дөрвөн хүний хамт хөөрсөн байна. Тодруулбал, Мексикийн Тихуанагаас хүнд өвчний улмаас АНУ-д ирж эмчлүүлж байсан охин, түүний ээж, хоёр нисгэгч болон эмчийн хамт нисч байсан. Харамсалтай нь амьд үлдсэн хүн байхгүй.

Осол АНУ-ын тав дахь том хот болох Филадельфи хотын хүн ам шигүү суурьшсан хэсэгт байрлах гурван давхар Рузвельт худалдааны төвөөс хэдхэн минутын зайд болсон байна. Тийрэлтэт онгоц осолдсон газарт нь орон сууц, дэлгүүрээр дүүрэн тул их хэмжээний гал гарчээ. Холбооны нисэхийн удирдлагын (FAA) мэдээлснээр, "Learjet 55" онгоц орон нутгийн цагаар 18:30 цагийн орчимд Филадельфийн зүүн хойд нисэх онгоцны буудлаас хөөрч, 6.4 км-ийн зайд осолдсон байна. Тус нислэг Миссури мужийн Спрингфилд-Брансон үндэсний нисэх онгоцны буудал руу чиглэж байжээ. Эхэндээ тус агентлаг онгоцонд хоёр хүн байсан гэж мэдэгдсэн ч дараа нь үүнийг зургаа болгож өөрчилсөн байна.

Нислэгийг хянах "FlightAware" вэб сайтын мэдээлснээр, уг онгоцыг "Med Jets" хэмээх компани эзэмшдэг бөгөөд Флоридагаас Филадельфид дөрөв хүрэхгүй цагийн өмнө ирсэн байжээ.