Нийслэлийн гэмт хэргээс урьдчилан сэргийлэх зөвлөлийн хуралдаанаас гарсан шийдвэрийг танилцуулах үеэр Замын цагдаагийн газраас мэдээлэл өглөө.

Хотод үүсч байгаа зам тээврийн хөдөлгөөний гол шалтгаан нь дүрэмгүй, хариуцлагагүй жолооч нараас болж байна гэдгийг цагдаагийн байгууллагаас онцлов.

Замын цагдаагийн газрын дарга хурандаа С.ГАЛБАДРАХ:

-Улаанбаатарын замын хөдөлгөөнд хамгийн гол нөлөө үзүүлж байгаа зүйл бол хариуцлагаүй хөдөлгөөнд оролцдог байдал. Замын хөдөлгөөний түгжрэл сааталд олон хүчин зүйл нөлөөлж байгаа боловч хариуцлагагүй жолооч нараас болж зам тээврийн осол ихээр гарах, түгжрэл үүсэх, явган зорчигчийн аюулгүй байдалд эрсдэл учирч байна. Тээврийн цагдаагийн алба Улаанбаатарт гарч байгаа зам тээврийн ослыг бууруулах, жолооч нарыг хариуцлагажуулах ажлуудыг хийгээд явж байгаа. Цаашид ч хийнэ.

Хотын 176 уулвар дээр хөдөлгөөнд хяналт тавих камержуулалт, байнгын дүрэм зөрчигддөг байршлуудыг иргэдээс санал авч мөн камержуулж байна.

Мөн хотын их тойруу, бага тойруу чиглэлд хөдөлгөөн зохицуулахаас гадна бусад замуудад хөдөлгөөний аюулгүй байдлын хяналт тавих олон нийтийн цагдаагийн тоог нэмсэн байгаа. Жолооч нарыг соёлжуулахаас гадна ерөнхий боловсролын сургуульд замын хөдөлгөөний дүрмийн сургалт оруулах, сургалтын төлөвлөгөөнд оруулах саналыг нийслэлийн гэмт хэргээс урьдчилан сэргийлэх зөвлөлд хүргүүлээд байна.