Нийслэлийн гэмт хэргээс урьдчилан сэргийлэх ажлын зохицуулах салбар зөвлөлөөс өнөөдөр /2025.01.31/ мэдээлэл хийлээ. 

НИТХ-ын дарга А.БАЯР:

-2025 оны бид авлигын эсрэг жил болгож байгаа. Нийслэлийн хэмжээнд төрийн үйлчилгээний дарамтыг арилгах, хугацаа бага зарцуулдаг болох зэрэг бүх боломжийг хууль эрх зүйн хувьд шинэчлэх сайжруулах, мөн шүүр болон шүгэл ажиллагааг зохион байгуулах чиглэлээр хамтарч ажиллахаар томоохон төсөл, хөтөлбөрүүдээ гарган ажиллаж байна. Энэ хүрээнд Улаанбаатар хотын төрийн албан хаагчид иргэддээ нээлттэй, ил тод хандсан төрийн үйлчилгээг нэвтрүүлэх, ингэхдээ авлига, ашиг сонирхлоос ангид байхыг онцолъё.

Иргэдэд бид шүгэл үлээх боломжийг л олгож өгнө. Өөрөөр хэлбэл, иргэдэд авлига, ашиг сонирхол байвал ямар хор нөлөөтэйг таниулъя. Нөгөө талдаа иргэд авлига, ашиг сонирхлын зөрчил үүсгэж байгаа албан тушаалтныг олон нийтэд мэдээлэх боломжийг олгож өгье гэж байгаа.

Энэ бүх бололцоог Авлигатай тэмцэх газар болон Нийслэлийн Прокурорын газартай хамтарч зохион байгуулж ажиллана. Өмнө нь хэрэгжиж байсан шүүр ажиллагаа үр дүнд хүрсэн талаар мэргэжлийн байгууллагуудаас мэдээлэл авсан. Цаашид төрийн албанд орж ажиллах алба хаагчийг хэн нэгний танил талаар биш нээлттэй сонгон шалгаруулалтаар авдаг байх төлөвлөлтийг хийж ажиллахаар болсон.

Нийслэл 1.6 хүн амтай. Иргэдийн хүсч байгаа гол зүйл бол тав тухтай, таатай орчин нөхцөлд амьдрах. Тэгвэл богино хугацаанд яаж иргэдийн амьдрах орчныг гэм хэрэг зөрчилгүй, ая тухтай болгох вэ? гэдгийг бид бодлого боловсруулагчдын хувьд 2025 онд анхаарна. Бид бодлогын хувьд урьдчилан сэргийлэх чиглэл рүүгээ л ажилладаг байх эрх зүйн орчин, бодлогын баримт бичгийг анх удаа бэлэн болгохоор ажиллахаар болсон. Өнөөдөр байгаа бодит энгийн нэг жишээ хэлэхэд, үйл ажиллагаа эрхэлж байгаа аж ахуй нэгжээс цагдаагийн байгууллагад ирж буй дуудлага 1000-ны тал хувь нь. 365 өдрийн 400 гаруй дуудлагыг харахад ердөө тэр аж ахуй нэгж байгууллага дээр л гэмт хэрэг, зөрчил гардаг. Энэ юуг хэлж байна вэ гэхээр цагдаагийн байгууллагыг аж ахуй нэгж хувийн хамгаалалтын үйл ажиллагаа эрхлүүлээд байна.

Тиймээс бид нэг обьект-нэг гэмт хэрэг гэдэг бодлогыг хэрэгжүүлнэ. Нэг удаа гэмт хэрэг гарсан обьектод дахиж гэмт хэрэг гарахгүй байх орчинг бүрдүүлж чадвал цагдаагийн байгууллагын ажиллах нөхцөл ч хүрээний хувьд зөв чиглэлд орж эхэлнэ.

Гэмт хэргээс урьдчилан сэргийлэхэд ердөө л хамтын ажиллагаа чухал.

Мөн сүүлийн үед архинаас хамааралтай гэмт хэрэг, зөрчлийн тоо мэдээлэл олон нийтийг их цочроож байгаа. Гэр бүлийн хүчирхийллийн 54 хувь нь согтуугаар үйлдэгдэж байгаа гэмт хэрэг байна. Эрүүгийн гэмт хэрэгт холбогдож байгаа хүмүүсийн мөн 30 гаруй хувь нь мөн согтуугаар үйлдэгдсэн гэмт хэрэг эзэлж байна.

Миний авсан мэдээллээр 29 хүртэлх насны 24 мянган залуучууд ял эдэлж байна. Энэ бол маш харамсалтай тоо.

Тэгэхээр цаашид архинаас хамааралтай гэмт хэрэг, зөрчилтэй тэмцэхгүйгээр нийслэлийн гэмт хэргээс урьдчилан сэргийлэх ажлыг зохион байгуулах ямар ч боломжгүй гэж харж байгаа. Тиймээс бид энэ чиглэлд цаашид үйл ажиллагаагаа чиглүүлнэ. Бид өмнө нь нөлөөллийн маш олон аян зохион байгуулсан. Намайг алгас!, битгий архи өг! гэдэг контентуудыг олон нийтийн мэдээллийн хэрэгслээр тогтмол дамжуулж байгаа. Гэхдээ нэг асуудал байгаа нь үйлчилгээний байгууллагууд 0 хувийн алкахол агуулсан бүтээгдэхүүн худалдаалах нь ховор байна. Тийм учраас бид энэ боломжийг хүртэл бүрдүүлэхэд анхаарна. Залуучуудыг архинаас татгалзахад үйлчилгээний байгууллагын худалдаалж байгаа бүтээгдэхүүний сонголт ч нөлөөлнө. 0 градустай пиво, дарсны сонголтыг залуучуудад хийх үйлчилгээ хэрэгтэй. Гэмт хэргээс урьдчилан сэргийлэхийн тулд бид үйлчилгээний байгууллагуудтайгаа дээр хэлсэнчлэн хамтарч ажиллана. Тэгвэл энэ төрлийн архинаас хамааралтай гэмт хэрэг, зөрчил буурах боломжтой.

"ЦАХИМ ГЭМТ ХЭРЭГТ ӨРТӨЖ БАЙГАА 10 ХҮН ТУТМЫН ДОЛОО НЬ ГЭРТЭЭ ХҮҮХДЭЭ ХАРЖ БАЙГАА ЭЭЖ БАЙНА"

Дэлхий нийт глобалчлагдаж байна. Хүн бүр гар утсаараа бүх үйлчилгээгээ авч байгаа. Гэтэл нэг зүйл үнэхээр цочирдом байна. Монголчууд гадаадын байгууллагынхантай нэгдэж монголчуудаа хулхидах, тэдний мөнгийг хурааж авах, залилах төрлийн гэмт хэргийг цахимаар үйлддэг ноцтой нөхцөл байдал улам бүр даамжирч байна. Хохирогч 10 хүний 6-7 нь гэртээ хүүхдээ хараад сууж байгаа ээжүүд байна. Тиймээс цахим гэмт хэрэгтэй тэмцэхгүйгээр бид нийслэл Улаанбаатар хотыг гэмт хэрэггүй болгон гэж ярих боломжгүй.

Сүүлийн үед залуучууд цахим мөрийтэй тоглоомд ч донтох нь ихэссэн.

Гадаад руу урсч байгаа мөнгөний урсгалыг харахад зөвхөн цахим мөрийтэй тоглоомын улмаас 200 сая ам.долларыг гадагш алдаж байна. Энэ бол үндэсний аюулгүй байдлын түвшинд яригдах асуудал.