Өвлийн улиралд бидний хамгийн их хүсдэг зүйлийн нэг бол машин барихад авто зам нь халтиргаагүй, гудамж, явган хүний замаар явж байхдаа халтирч унахгүй байх. Утаагүй, түгжрэлгүй, халтиргаагүй Улаанбаатар хотод амьдарчихвал өөр нэг их зүйлийг бид хүсдэггүй. Улаанбаатар хот төдийгүй Засгийн газрын хэмжээнд утаа, түгжрэлийг шийдэхээр олон талт төслийг нэгэн зэрэг эхлүүлээд байгаа. Хэрэгжээд, хэдэн жилийн дараанаас үр шимийг нь хүртээд ирэхээр утаа, түгжрэл арилах найдвар бий. Тэгвэл Улаанбаатар хотыг өдөр бүр халтиргаа, гулгаагүй авто зам, гудамж талбайтай болгохын төлөө тохижилт үйлчилгээний байгууллагууд, хотын нийтийн аж ахуйн салбарынхан, ТҮК-ийн ажилчид цаг наргүй ажиллаж байна. Тэдний ажил бол үйлчилгээний ажил. Тиймээс цаг наргүй өдөр бүр л сайн ажиллаад л байж үр дүн гардаг.

2024 оноос тохижилт үйлчилгээний ажлыг ганц Улаанбаатар хот хариуцах нь тохиромжгүй юм байна. Харин есөн дүүргийн хэмжээнд чиг үүргээ хуваалцан, дүүрэг бүрийн хот нийтийн аж ахуйн салбараа дүүрэг өөрсдөө хариуцан ажиллах нь үр дүнтэй гэсэн шийдэлд хүрсэн. 2024-2025 онд шилжих өвөл хотын дарга Х.Нямбаатарын гаргасан тус шийдвэрийн үр дүнг харж байна. Өмнө нь халтиргаа гулгаагүй өвөлжих асуудлыг дан ганц хот хариуцахад есөн дүүргийнхээ хэмжээнд хүрч үйлчлэхэд хэцүү байсан. Харин өнөөдөр Улаанбаатар хотын зам, талбайг 36 байгууллагын 1200 гаруй зам талбайн үйлчлэгч, 670 гаруй тусгай зориулалтын техник хэрэгсэлтэйгээр цэвэрлэж байна. Цас цэвэрлэгээ, зам цэвэрлэгээний тусгай зориулалтын 283 машин техник ажиллаж байна. Дүүрэг бүр авто зам, явган хүний зам, нийтийн эзэмшлийн зам талбай, зуслангийн бүсүүдийн зам талбай зэргээ өдөр бүр хариуцан цэвэрлэж байна. Дүүргүүдээс цэвэрлэх чиг үүргээ хэрэгжүүлэхийг шаардах хариуцлагын тогтолцоо ч бий болжээ.

Цас орох мэдээллийг нийслэл, дүүргүүд 24 цагийн өмнө хүлээн авч, цаг уурын байгууллагатай уялдаа холбоотой ажиллаж байна. Өмнөх өдөр нь нэгдсэн байдлаар мэдээлэл авсан учраас цас цэвэрлэгээндээ урьдчилан бэлддэг болжээ. Улмаар зам талбайн ажилчид 24 цагаар жижүүрлэн халтиргаа гулгаа үүсэхээс сэргийлэн ажиллаж, цастай өдөр бүр ажлын явцаа мэдээлдэг болжээ. Энэ бол энгийн сонсогдох боловч хот, нийтийн аж ахуйн салбартаа соёлын болон тогтолцооны буюу менежментийн томоохон шинэчлэлтийг авчирчээ.