АНУ-ын ерөнхийлөгч Дональд Трамп Бямба гаригаас /2025.02.01/ эхлэн Канад, Мексикийн импортод 25 хувийн татварын нэмэгдэл тавихаа албан ёсоор мэдэгдэв. Гэхдээ тус хоёр улсаас орж ирэх газрын тосны импортод татварын нэмэгдэл тариф үйлчлэх эсэх нь тодорхойгүй байна. Цагаан ордны зууван танхимаас Трамп мэдэгдэл гаргаж, нэмэгдэл тариф нь тухайн хоёр орноос хууль бусаар АНУ-ын хил давсан цагаач болон Хятадын фентанилыг нэвтрүүлж байсны шийтгэл гэж дахин онцлон тэмдэглэжээ.

Үүнээс гадна, Трамп Хятадад татвар ногдуулах талаар бодолцож байгаа ч тодорхой шийдэлд хүрээгүй байна.

Тэрбээр хэлэхдээ "Надад Хятадыг яах талаар төлөвлөсөн зүйлс бий. Хятад манай улс руу их хэмжээний фентанил илгээснээс болж жил бүр хэдэн зуун хүнийг үхэлд хүргэдэг. Тиймээс Хятад нэмэгдэл татвар төлөх болно. Бид хэлэлцэх шатандаа явж байгаа" гэжээ. Түүний хувьд Хятадад татварын нэмэгдэл тариф тогтоосноор АНУ-ын эдийн засагт хэрхэн нөлөөлөхийг судлах тусгай шинжээчдийн баг гаргасан. Канад, Мексикийн адил хоёрдугаар сарын 1-нд Хятадад 10 хувийн нэмэгдэл ногдуулна гэж хэлж байсан ч албан ёсны шийдэлд хүрээгүй байгаагаа Трамп ийнхүү тайлбарлажээ.

Канад болон Мексикийн засгийн газар Трампийн тавьсан татварт өөрсдийн журмын дагуу хариу арга хэмжээ авна гэж мэдэгдсэн.

Гэхдээ хил давж буй хууль бус цагаачдын асуудалд илүү анхаарал хандуулахаа Вашингтонд илэрхийлсэн юм. Гэхдээ Трампийн ногдуулах татвар тухайн хоёр орноос импортлогдох газрын тосонд мөн адил үйлчлэх бол энэ нь АНУ-ын шинэ засаг захиргааны амлаад буй амьжиргааны зардлыг бууруулах ажилд сөргөөр нөлөөлнө. Учир нь тус улс нийт газрын тосныхоо 40 хувийг Канадаас авдаг билээ.