Цахим спортын "CS2" төрлийн энэ оны ээлжит нэгэн том тэмцээн Польш улсад эхэлсэн. Нэг сая ам.долларын шагналын сантай, өнө эртний түүхтэй "IEM Katowice" тэмцээнд дэлхийн шилдэг 24 баг өрсөлдөж байгаагийн нэг нь Монголын "The MongolZ" баг билээ. Тэмцээн хэдийнэ эхэлсэн бөгөөд урьдчилсан шатны тоглолтууд үргэлжилж байна. Энэ жилийн тухайд "The MongolZ" баг "Valve"-ийн дэлхийн чансааны гуравдугаарт бичигдэж байгаа гэдэг утгаараа шууд плей-оффын шат руу шалгарсан. Тэдний хувьд өчигдөр/2024.01.30/ Катовице хотноо хүрэлцэн ирж, байрлажээ.

Харин угталтын захидал дээр нь тэмцээнийг зохион байгуулагч "ESL"-ийн зүгээс "Та нарын зорилго том гэдгийг мэдэж байна. Та нар энд Азийн шилдэг бус дэлхийн шилдэг байх гэж ирсэн. Монголын тугийг Катовицегийн хөрсөн дээр мандуулаарай. Амжилт хүсье, The MongolZ" гэжээ.

"The MongolZ" тэмцээний эхний тоглолтоо хоёрдугаар сарын 2-нд хийх хуваарьтай.

"Katowice 2024" тэмцээний тухайд өнөөдрийн байдлаар Францын "3DMAX", Германы "GamerLegion", Туркийн "Eternal Fire" багууд плей-оффын шат руу шалгараад байна. Өнөөдөр үлдсэн багууд нь тодорно.

Тэмцээний чимэг байсан Бразилын "Imperial" багийн эмэгтэйчүүд өчигдөр Германы "BIG" багт хожигдсоноор тэмцээнээ өндөрлүүлжээ. Гэхдээ тэд эмэгтэйчүүд ч гэсэн боломж нь гарвал эрчүүдтэй эн тэнцүү өрсөлдөх боломжтой гэдгийг харуулсан билээ.