Сирид удирдагч асан Башар аль-Ассадын дэглэм нуран унаснаар Оросын боомтуудын хувь заяа тодорхойгүй болоод байв. Тэгвэл ОХУ Сириэс цэргээ эрчимтэйгээр эргүүлэн татаж, Тартус боомтоос машин, техник хэрэгслүүдээ зөөвөрлөж эхэлснийг хиймэл дагуулын зургаас тодорхой болгожээ. "Planet Labs"-ын Лхагва гаригт нийтэлсэн зургуудыг харвал боомтод Оросын хөлгүүд ирээд буцсаны дараа ихэнх эд хөрөнгө алга болсон байв.

Нэгдүгээр сарын 21, 22-нд Тартус боомтод Спарта ба Спарта II гэсэн хоёр хөлөг онгоц зогссоныг хөлөг онгоцны ажиглалтын цахим хуудсууд харуулсан. Эдгээр хөлөг онгоц нь Оросын Батлан ​​хамгаалах яамны харьяа далайн тээврийн компани болох "Оборонлогистика" ХХК-ийн эзэмшилд байдаг. Мөн хоёр хөлөг хоёулаа Оросын зэвсгийн тээвэрлэлттэй холбоотой гэсэн үндэслэлээр АНУ-ын хоригт хамрагдсан.

"MarineTraffic" хуудаснаа мэдээлснээр Спарта II Даваа гаригт боомтоос хөдөлсөн байна. Харин Мягмар гаригийн өглөө тус хөлөг Киприйн эргийн ойролцоо Газар дундын тэнгисээр дамжин баруун тийш явж байжээ.

Лхагва гаригт Спарта хөлөг нь боомтоос хөдөлсөн бололтой. Хиймэл дагуулын зураг харвал хөлгийн ойролцоо байрлуулсан байсан чингэлгүүд алга болсон байжээ.

Оросын эрх баригчид Дамаск хотноо Сирийн шинэ засгийн газартай илэн далангүй хэлэлцээ хийсэн гэх мэдээлэл мөн гарсан. Сирийн шинэ засгийн газар боомт түрээсийн гэрээг цуцалсан байж магадгүй байна. Кремль Ассадын дэглэм нуран унасны дараахан баазын хяналтыг хэвээр үлдээхийг хүсч буйгаа мэдэгдэж байсан. Гэсэн ч өдгөө үнэ цэнтэй эд хөрөнгүүдээ нүүлгэн шилжүүлснийг харвал байдал өөрчлөгдсөн бололтой.

Тартусаас гадна Хмеймим агаарын бааз ч бас эд хөрөнгүүд нь цөөрсөнийг хиймэл дагуулын зураг харуулжээ.

Сонирхолтой нь ОХУ Сириэс нүүлгэн шилжүүлсэн эд хөрөнгүүдээ Украины эсрэг фронтод байрлуулах магадлал өндөр байгааг Бельгийн тэнгисийн цэргийн дэслэгч, шинжээч асан бөгөөд далайн мэргэжилтэн Фредерик Ван Локерен хэлэв.