Монголын волейболын холбооноос зохион байгуулдаг үндэсний дээд лигийн 2024-2025 оны улирал өндөрлөж, аваргууд тодорлоо. Степпе аренад жил дамнан хоёр тойрог үргэлжилсэн улирлын плей-оффын тоглолтууд тун сонирхолтой болж өнгөрлөө.

Эрэгтэйчүүдийн лигийн хүрэл медалийн эздээр "SG Hawks" баг тодорлоо. Угтаа тэднийг энэ жил аварга авч, өнгөрсөн жилийн амжилтаа ахиулах болов уу гэж фэнүүд нь хүлээж байсан ч хагас шигшээд Төв Миг багийг дийлээгүй. Улмаар хүрэл медалийн төлөө өнгөрсөн жилийн аварга Натурс Бакс багийг буулган авчээ.

"SG Hawks" баг улирлыг тун өнгөтэй эхлүүлж, ялагдал гээчийг үзээгүй нэг хэсэг лигт ноёлсон. Гэвч улирлын төгсгөлд хамгийн чухал үед формоо хадгалж чадсангүй.

Тэгвэл эрэгтэйчүүдийн лигийн аваргын төлөө Хасу Мегастарс болон Төв Миг багууд хүчийг үзлээ. Улирлын эхэнд Хасуг финалд хүрэх магадлалтай гэж волейбол сонирхогчид ярьж байсан. Таамаг ч биеллээ олж, тэд шалгарч чадав. Улмаар 2019 оны амжилтаа давтаж, дахин нэг удаа Үндэсний дээд лигийн аваргаар тодорчээ. Хасу Мегастарс финалд Төв Мигийг 3-0 гэсэн харьцаатай илт илүүрхсэн аж.

Төв Миг энэ улирлын плей-оффын чимэг нь байлаа. Тэд хүчирхэг "SG Hawks"-ийг хагас шигшээд буулган авч, жинхэнэ шуугианыг тарьсан. Ялангуяа цувралын шийдвэрлэх тоглолтын сүүлийн сетэд хэцүү байдлаас гайхалтай эргэн ирж, ялалт байгуулсан түүхтэй.

Харин эмэгтэйчүүдийн лигийн аваргаар Улаанбаатар Финикс баг тодорлоо. Тэд улирлын эхнээс хүчтэй гэдгээ харуулж явсаар финалд Ховд Ижил алтай Торгууд багийг хожлоо. Хүрэл медалийн эздээр Хөвсгөл Эрчим баг тодорчээ.

Улирлын шагналтнуудаар дараах тамирчид тодорчээ.

• Шилдэг легионер – Мануэла Сьерра Посада /Улаанбаатар Финикс/
• Шилдэг легионер – Скляренко Евгений /Хасу Мегастарс/
• Шилдэг давуулагч – Л.Хосбаяр /Хөвсгөл Эрчим/
• Шилдэг давуулагч – Б.Анхбаяр /Төв Миг/
• Шилдэг хаагч – П.Энххүслэн /Улаанбаатар Финикс/
• Шилдэг хаагч – О.Чойжилсүрэн /SG Hawks/
• Шилдэг хамгаалагч – М.Санчирмаа /Улаанбаатар Финикс/
• Шилдэг хамгаалагч – З.Буянжаргал /Хасу Мегастарс/
• Шилдэг холбогч – Ц.Цэдэвнамбар /Улаанбаатар Финикс/
• Шилдэг холбогч – Г.Төрмандах /Хасу Мегастарс/
• Шилдэг довтлогч – Жасутейсу Яауч /Ховд Ижил алтай Торгууд/
• Шилдэг довтлогч – Г.Цэнд-Аюуш /Төв Миг/
• Шилдэг дасгалжуулагч – И Сүн Кью /Хасу Мегастарс/
• Шилдэг дасгалжуулагч Б.Мөнгөнхуяг /Улаанбаатар Финикс/
• Шилдэг шүүгч – Ц.Алтан-Өлзий
• Үнэ цэнтэй тоглогч -Б.Баярсайхан /Хасу Мегастарс/
• Үнэ цэнтэй тоглогч – Ж.Баянжаргал /Улаанбаатар Финикс/