Эрчим хүчний яамны Төрийн нарийн бичгийн дарга Н.Тавинбэх “Цахилгааны үнийг аж ахуй нэгж дээр 30 хувиар ахуйн хэрэглэгч дээр хэрэглээнээс нь хамаараад 89 хувь хүртэл нэмсэн” гэж мэдэгдлээ.  Тодруулбал, эрчим хүчний ахуйн хэрэглээний сарын үнэ 100 кВт цаг хүртэл  хэрэглэсэн бол 30 хувиар, 150-300 кВт цаг хүртэл хэрэглэсэн бол 61 хувиар, 300 кВт цагаас дээш хэрэглэсэн бол сарынх нь төлбөр 89 хувиар нэмэгдэж тооцогдож буй аж.

Дээрх зохицуулалт хийсэн үндэслэлээ Н.Тавинбэх дарга “Эрчим хүчний ахуйн хэрэглэгчийн үнийг удаан хугацаагаар нэмээгүй байсан, өртөгт нь хүргэх зорилгоор аж ахуй нэгжүүдээс өндөр үнээр нэмэлт хийсэн.

Мөн оргил ачааллын үед эрчим хүчний чадлын дутагдалд орж, хязгаарлалт хийж буй тул өндөр хэрэглээн дээр үнэ нэмэгдэх тариф мөрдөж байгаа. Эрчим хүчний үнийг нэмэх шийдвэрийг яам гаргадаггүй. Эрчим хүчний зохицуулах хороо хараат бусаар шийдвэр гаргадаг хуультай” гэж мэдэгдэв.

Сануулахад, Засгийн газраас өнгөрсөн оны арваннэгдүгээр сарын 15-наас эхлэн эрчим хүчний үнийг нэмж байгааг зарласан. Үүнээс хойш амины орон сууцаа цахилгаанаар халаадаг ард иргэд цахилгааны төлбөр өндөр гарах болсон тухай асуудлыг хөндөж, хөнгөлөлт эдлүүлэх шаардлага байгааг мэдэгдэх болсон.  Нөгөө талдаа тэднийг худлаа сенсацилж байна гэж буруутгах хэсэг ч бас бий. Тэгвэл ахуйн хэрэглэгч нарын хувьд эрчим хүч хэр их хэрэглэнэ, түүнээсээ шалтгаалж төлөх төлбөр нь их, бага байх эсэх нь шийдэгдэх болж буйг сануулъя.

Г.ХОРОЛ