ОХУ-ын ерөнхийлөгч Владимир Путин хэлэхдээ, Украины ерөнхийлөгч Володимир Зеленскийд энхийн хэлэлцээнд оролцох эрх байхгүй гэжээ. Хэрэв Зеленский заавал өөрийн биеэр оролцох хүсэлтэй байгаа бол Оросын талыг төлөөлөх төлөөлөгч томилно гэж мэдэгдсэн байна.

Путин Мягмар гаригт Оросын төрийн хэвлэлд өгсөн ярилцлагадаа Украинтай үргэлжилж буй мөргөлдөөний талаар ярьсан юм. Түүний хувьд өнгөрсөн оны тавдугаар сард Зеленскийн ерөнхийлөгч байх албан ёсны хугацаа нь дууссан тул ямар ч хэлэлцээнд оролцох ёсгүй гэж үзэж байна. Түүнчлэн, гал зогсоох хэлэлцээг эцэслэж, баримт бичигт гарын үсэг зурах дээрээ тулах юм бол Украин, Оросын аюулгүй байдлыг урт хугацаанд, түүхэнд дурсагдах хэмжээнд баталгаажуулах ёстой гэж мэдэгджээ. Гэсэн хэдий ч ярилцлагын үеэр Путин Украиныг тохуурхсан хэдэн хэдэн зүйлс хэлсэн байна.

Жишээлбэл, хэрэв Украинд үзүүлэх зэр зэвсэг, санхүүгийн тусламж зогсох юм бол тус улс нэг сар ч тэсэхгүй гэж хэлсэн аж.

Үүгээр дамжуулан барууны тусламж зогсох юм бол Украин Орост хариу цохилт өгөх боломжгүйг илэрхийлж байна гэж ажиглагчид үзэж буй.

Уг ярилцлага цацагдсан мөн өдөр Зелеснкий өөрийн цахим хуудсаараа дамжуулан хариу мэдэгдэл хийсэн юм. Тэрбээр хэлэхдээ, "Путин хэлэлцээрээс, хүчтэй удирдагчдаас айж байгаа тул дайныг уртасгахын тулд чадах бүхнээ хийж байгаагаа нотоллоо. Түүний алхам бүх нь дайныг эцэс төгсгөлгүй болгоход чиглэгдэж байна" гэж шүүмжилжээ. Тэрбээр мөн Путинг дэлхийг сүйрүүлэх асар их чадвартай ч дэндүү жижиг, хулчгар зүрхтэй гэж тодорхойлсон байна. Зеленский мөн ОХУ-ын эсрэг уялдаа холбоотой, шийдэмгий арга хэмжээ авахыг бусад улс орнуудад уриалжээ.