Башар Аль-Ассадын дэглэм нуран унаснаас хойш анх удаа Оросын өндөр албан тушаалтнууд Сирид айлчилжээ. Тодруулбал, өнгөрсөн хугацаанд Ассадын дэмжлэгтэйгээр Оросын хоёр том цэргийн бааз Сирид үйл ажиллагаагаа явуулж байсан. Гэвч босогчдын Хаят Тахрир аль-Шам (HTS) бүлэг Ассадын дэглэмийг нуран унагааж, түүнийг эх орноосоо оргон зайлахаас өөр аргагүй болсон тул Оросын цэргийн баазын ирээдүй тодорхойгүй байсан юм.

Улмаар Сирийн шинэ засгийн газартай уулзахаар Оросын Гадаад хэргийн яамны дэд сайд Михаил Богданов, Путины Ойрхи Дорнод, Африкийн асуудал эрхэлсэн тусгай төлөөлөгч, мөн ерөнхийлөгчийн Сирийн асуудал эрхэлсэн тусгай төлөөлөгч Александр Лаврентьев нар Дамаскад хүрэлцэн иржээ.

Тус албан тушаалтнууд Тартус дахь тэнгисийн цэргийн бааз болон Хмеймим дэх агаарын баазынхаа хувь заяаг баталгаажуулахыг эрмэлзэж байгаа тул Сирийн шинэ удирдагч Ахмед аль-Шараа, Гадаад хэргийн сайд Асад аль-Шайбани болон бусад албаныхантай уулзахаар төлөвлөжээ. Дэд сайд Богдановын хувьд 1980-1990 оны хооронд Сирид дипломат байсан төдийгүй Араб хэлээр ярьж чаддаг байна. Удирдагч аль-Шараа бол ОХУ-д “террорист” гэж үзэхийг хориглосон "HTS"-ийн тэргүүн юм. Түүний босогчдын бүлэг нь "Аль-Каида"-гийн Сири дэх салбараас гаралтай боловч сүүлийн үед илүү даруухан дүр төрхтэй болсон байдаг. "RT Arabic" агентлагийн мэдээлснээр, Богданов энэхүү айлчлалаа хамтын ашиг сонирхолд тулгуурласан түүхэн холбоог бэхжүүлэх зорилготой гэж тодорхойлжээ. Мөн Сирийн эв нэгдэл, тусгаар тогтнолын төлөө Орос улс дэмжлэг үзүүлэхээ онцолсон юм.