АНУ-ын тэргүүн хатагтай Меланиа Трампийн албан ёсны гэрэл зургийг Цагаан ордон Даваа гаригт олонд дэлгэсэн. Гэрэл зургийг Парист ажиллаж амьдардаг бельги гэрэл зурагчин Режин Махоу авчээ. Тэрбээр Трампийн гэр бүлийнхний гэрэл зургийг 20 жил авч байна. Нью-Йорк дахь Трамп цамхагт авхуулсан тэдний гэр бүлийн алдартай зургууд болон Трампийн анхны бүрэн эрхийн хугацааны албан ёсны гэрэл зураг ч үүнд багтана. Трамп хошин шогийн өндөр мэдрэмжтэй, зураг авалтын үеэр таатай уур амьсгал бүрдүүлдэг гэдгийг тэр хэлж байсан удаатай.

Харин энэ удаад Меланиатай хамтарч ажиллахад тэргүүн хатагтай тун бүтээлч нэгэн шиг санагджээ. Түүний бүтээлч байдал нь зураг авалтыг улам сонирхолтой болгож байсан аж. "Меланиа зураг авалтын үеэр надад болон баг хамт олонд маш хүндэтгэлтэй хандаж байсан. Ажил хэрэгч зан чанартай, ёс суртахуунтай эмэгтэй. Тэр надад нэг итгээд л энэ итгэлээ эргүүлж аваагүй шүү" гэж Махоу хэлжээ.

Меланиагийн албан ёсны гэрэл зургаар хар, цагаан өнгөтэй, орчин үеийн хэв маягтай зургийг сонгожээ. Түүний өмссөн хослол "Dolce & Gabbana" брэндийнх бөгөөд хүрэм нь 3245 ам.доллар, өмд нь 1495 ам.доллар, цамц нь 925 ам.долларын үнэтэй. Мелаина 2017 онд албан ёсны гэрэл зургаа авхуулахдаа мөн л "Dolce & Gabbana"-г сонгож байв.

Тангараг өргөх ёслолын үеэр Меланиагийн өмссөн даашинзуудын загварыг зохиосон Херв Пьер зураг авалтыг хэв маягийг хариуцан ажиллажээ.

Албан ёсны гэрэл зургийг Цагаан ордны Зууван танхимд авсан. Цонхны цаана Вашингтоны хөшөө харагдаж буй нь гэрэл зурагт улам хүч нэмж өгчээ.

Хар хослолтой ширээ тулан зогсох Меланиагийн шийдэмгий дүр төрх идэвхтэй, шаргуу, хүчирхэг, хүндэлмээр, хээнцэр харагдана. Энэ байдал нь яг л байр сууриа хүлээж авахад бэлэн байгаа эмэгтэйн дүр төрх гэдгийг гэрэл зурагчин Махоу онцолжээ.

Меланиа энэ удаад олон нийтэд ил тод байхаа амлаад буй. Тийм ч учраас тэр өнгөрсөн аравдугаар сард "Меланиа" гэх дурсамж номоо хэвлүүлээд амжсан билээ. Удахгүй түүний амьдралыг өгүүлсэн баримтат кино хүртэл гарах аж.