Трампийн засаг захиргаа ажлаасаа гарахыг хүссэн холбооны албан хаагчдад онцгой тэтгэмж санал болгожээ. АНУ-ын боловсон хүчний удирдлагын албанаас ажилтнуудад энэхүү саналыг Мягмар гаригт хүргүүлсэн байна. Холбооны албан хаагчид хоёрдугаар сарын 6 гэхэд халагдах өргөдлөө өгвөл найман сарын турш тэдэнд ажилгүйдлийн тэтгэмж өгөх аж.

Санамж бичигт "Хэрвээ та холбооны албанд үргэлжлүүлэн үүрэг гүйцэтгэхийг хүсэхгүй байгаа бол бид таны улс оронд оруулсан хувь нэмрийг үнэлэн, эндээс нэр төртэйгөөр шударга явах боломжийг олгоно" гэсэн байв.

Санамж бичигт "Fork in the Road" буюу "Салаа замын уулзварт" гэсэн утгатай гарчиг өгчээ. Элон Маск 2022 онд "Х"-ийн ажилтнуудад дээрхтэй ижил сонголт өгөхдөө мөн "Салаа замын уулзварт" гэсэн гарчигтай санамж хүргүүлсэн билээ. Өдгөө АНУ-ын Засгийн газрын үр ашгийн хэлтсийг удирдаж буй Маск холбооны зардлыг багасгахын тулд ажиллах хүчийг эрс цөөрүүлэх тухай ярьж байсан удаатай.

Холбооны засгийн газар ойролцоогоор хоёр сая ажилтантай. Хэр олон ажилтан ажлаасаа гарч, тэтгэмжийн зардал хэд болох нь одоогоор тодорхойгүй байна. Өнөөдрийг хүртэл хүчинтэй мөрдөгдөж ирсэн захирамжийн дагуу дор хаяж 12 сар тасралтгүй ажилласан, ямар нэгэн зөрчил гаргаагүй ажилтан л тэтгэмж авдаг байв.

Ажилтнуудыг төлөөлдөг "Америкийн засгийн газрын албан тушаалтнуудын холбоо" Трампийн шийдвэрийг буруушааж байна. Учир нь холбооны албан хаагчдын тоо 1970 онтой ойролцоо байгааг тэд онцолжээ. Мөн ажилдаа гаршсан хүмүүсийг энэ маягаар чөлөөлөх нь эмх замбараагүй байдал үүсгэж, хүсээгүй үр дагаврыг авчирна гэлээ. "Цомхотголыг сайн дурынх гэж байгаа боловч бодит байдал дээр Трампийн засаг захиргаа холбооны засгийн газрыг ажилтнуудад хүссэн ч үлдэх боломжгүй хортой орчин болгож хувиргахаар байна" гэж тус холбоо мэдэгджээ.