Кино урлагийн хамгийн чухал үе бол яахын аргагүй Оскарын шагнал гардуулах ёслолын ажиллагаа билээ. Энэ жил 97 дахь удаагийн Оскарын шагнал гардуулах ёслол болох бөгөөд Лос Анжелес хотын Долби театрт болохоор төлөвлөгдсөн байна. Нэр дэвшигчдийн нэрс нэгдүгээр сарын 23-нд зарлагдсан төдийгүй гуравдугаар сарын 3-ны өдөр Улаанбаатарын цагаар 08:00-11:00 цагийн хооронд болно. Уг арга хэмжээг онц сонирхолтой болгох хамгийн чухал хүн нь хөтлөгч байдаг. Академийн шагнал гардуулах ёслолын зохион байгуулагчдын зүгээс Эммигийн шагналт хөтлөгч, зохиолч, продюсер, комедиан Конан О’Брайэнийг голлох хөтлөгчөөр сонгоод буй.

Энэ удаагийн шагнал гардуулах ёслол нийт 23 төрөлд хуваагдаж, 43 кино нэр дэвшсэн байна. Хамгийн олон төрөлд нэр дэвшсэн киноны хувьд 13 төрөлд "Emilia Perez" мюзикл, 10 төрөлд "The Brutalist" болон дуучин Ариана Грандегийн гол дүр бүтээсэн "Wicked" кино тус бүр багтжээ. Одоогийн байдлаар шилдэг кино номинацид:

• Anora
• The Brutalist
• A Complete Unknown
• Conclave
• Dune: Part Two
• Emilia Perez
• I’m Still Here
• Nickel Boys
• The Substance
• Wicked тус бүр нэр дэвшсэн байна

Шилдэг найруулагч номинацид:

• Anora- Шон Бэйкер
• The Brutalist- Брэйди Корбет
• A Complete Unknown- Жеймс Мэнголд
• Emilia Perez- Жак Одияр
• The Substance- Корали Фаржа нар нэр дэвшжээ.

Мэдээж хэрэг шилдэг эрэгтэй гол дүр номинаци хамгийн сонирхолтой. Үүнд:

• The Brutalist- Эдриен Броуди
• A Complete Unknown- Тимоти Шаламе
• Sing Sing- Колман Доминго
• The Apprentice- Себастьян Стэн
•  Conclave- Ральф Файнс  нар багтаж байна.

Харин шилдэг эмэгтэй гол дүрд:

• Wicked- Синтиа Эриво
• Emilia Perez- Карла София Гаскон
• Anora- Майки Мэдисон
• The Substance- Дэми Мур
• I’m Still Here- Фернанда Торрес нар юм.

Түүнчлэн, энэ жилийн кино наадмыг онцлог болгож буй хэд хэдэн зүйлээс дурдахад 62 настай жүжигчин Дэми Мур анх удаа Оскарт нэр дэвшиж буй. Харин 29 настай Тимоти Шаламе хоёр дахь удаагаа нэр дэвшиж байгаа аж. Мөн "Emilia Perez" мюзиклийн жүжигчин Карла София Гаскон нь Оскарт нэр дэвшиж буй хамгийн анхны трансжендер жүжигчин юм.