Аушвицийг чөлөөлсний 80 жилийн ойг дэлхий нийтээр тэмдэглэж байгаа энэ үеэр Анне Франкийн өдрийн тэмдэглэл дээр гардаг нуувчны бүрэн хэмжээний хуулбар Нью-Йорк хотод дэлгэгдлээ. Үүнийг Нидерланд дахь Анне Франкийн нуугдаж байсан байшин дээр үндэслэн бий болгосон байна. Тухайлбал, нууц хаалгыг далдлах зориулалттай номын тавиурын ард бодит хоёр давхар нуувч байх бөгөөд Анне Франкийн өдрийн тэмдэглэл дээр дурдсан байсан бүхий л тавилгууд бий.

Тус нуувчинд Анне Франк хоёр жилийн турш гэр бүлийн хамтаар нуугдаж, хожим 15 настайдаа хорих лагерьд нас барсан байдаг. Түүнийг хүндэтгэсэн үзэсгэлэн Даваа гаригт нээлтээ хийсэн бөгөөд Нью-Йорк хотод амьдардаг еврейчүүд зорьж очиж, үзэж байгаа аж. Үзэгчдийн дунд дайны үеэр өвөө эмээ нь Германаас АНУ руу дүрвэн ирсэн еврей эмэгтэй байв. Тэрбээр үзэсгэлэнгийн талаар сэтгэгдлээ хуваалцахдаа, "Энэ бүхэн хуучирсан мэт харагдаж байгаа ч хэзээ ч мартаж болохгүй түүх" гэж нулимс дуслуулан хэлжээ. Анне Франк Хаусын гүйцэтгэх захирал Рональд Леопольд бүрэн хэмжээний дуураймал нуувчийг утга учиртай, чухал өдөр нээхийг тэсэн ядан хүлээж байснаа мөн хүрэлцэн ирсэн олонд хэлсэн байна. Тэрбээр хэлэхдээ, "Бидний яг одоо туулж буй хүнд хэцүү цаг үед залуу охид бүсгүйчүүд бүгдээрээ сонирхоно гэдэгт итгэлтэй байна" гэсэн юм.