Цагтаа Европын хөлбөмбөгт цахиур хагалж, Бразилын домогт хөлбөмбөгчдийн залгамж халаа болж байсан Неймар ийнхүү нутаг буцлаа. Өдгөө 32 настай тэрбээр Саудын Арабын Аль Хилал клубтай харилцан тохиролцсоны үндсэн дээр гэрээгээ цуцалж, нутгийнхаа Сантос клуб руу эргэн очив. Түүний хувьд анх Сантос клубээс мэргэжлийн тамирчны замналаа эхлүүлж, улмаар Каталон үндэстний баяр, бахдал Барселона руу зарагдаж байсан түүхтэй.

2023 оны зун Неймар Францын ПСЖ клубыг орхиж, Аль Хилалтай нэгдсэн. Түүний төлөө Саудын Арабын баян баг 90 сая евро төлсөн гэдэг. Үүнээс гадна Неймарт жилийн 150 сая еврогийн цалин өгч, ПСЖ-д авч байсан цалинг нь зургаа дахин нэмжээ.

Кристиано Роналдо, Карим Бензема нарын нөлөө ч дээрх наймаанд байсан бөгөөд Неймар "Саудын лиг Францынхаас илүү байвал би лав гайхахгүй" гэж байлаа. Неймар хэзээ ч Аль Хилалд хүссэн тоглолтоо толилуулаагүй. Тэрбээр ердөө долоон тоглолтод оролцож, нэг гоол оруулан, хоёр гоолын дамжуулалт өгчээ. Гэхдээ цалингаа бүтнээр нь авч, элдэв тусгай хэрэгцээгээ хангуулж чадсан.

Неймар Аль Хилал клубт улирал дуустал үлдвэл гэрээний үлдэгдэл төлбөр 65 сая ам.доллар авах байсан ч төрөлх багтаа, гэртээ, нутагтаа тоглохын төлөө энэ мөнгөнөөс татгалзаж, гэрээгээ цуцлахыг хүсчээ.

Неймарыг Бразилаас төрөн гарах дараагийн Алтан бөмбөгийн эзэн гэж ярьдаг байв. Багаасаа л тэр тодорсон. Гоолын мэдрэмж, хууралт, техник, хурд, биеэ авч яваа байдал гээд орчин үеийн хөлбөмбөгийн тод од нь байсан. Харамсалтай түүнийг бэртэл гэмтэл хойш татав. Түүнийг зарим нь "Хаан болоогүй ханхүү" гэж ярьдаг. Тэртээ 2017 онд Неймар Мессигээс сүүдрээс зугтааж, ПСЖ-ийг зорьсон. Барселонад Мессигийн сүүдэр дэндүү том байсан бол болохоор Неймар үргэлж хоёрдугаарт зарим үед гуравдугаарт яригдаж байлаа. Сүүлийн үед Неймарыг АНУ-ын Интер Майами клубтай гэрээ байгуулж, Месси, Суарез нартай эргэн нийлнэ гэх шуум гарсан ч бодит байдал тэс ондоогоор эргэв.

Неймар Сантос клубын төлөө 177 тоглолтод 107 гоол оруулсан амжилттай.