НҮБ-ын дэргэдэх Дэлхийн аялал жуулчлалын байгууллага 2024 оны тайлангаа саяхан нийтэлжээ. Тус тайланг харвал цар тахлын үеэр уналтад ороод байсан аялал жуулчлал дэлхий дахинд гарцаагүй эргэн сэргэжээ. Газар сайгүй нисэх буудлуудын шалган нэвтрүүлэх цэгүүд дараалал ихтэй, зочид буудлын захиалгууд ч эрт хаагддаг болсон байна.

Тоо баримт танилцуулбал, өнгөрсөн жил 1.4 тэрбум орчим хүн олон улсад аялжээ. Энэ нь 2019 оны тоон үзүүлэлтийн 99 хувь нь гэсэн үг. Мөн хүмүүс аялал жуулчлалд 1.9 их наяд ам.доллар зарцуулжээ.

Тэгвэл энэ олон хүн хаашаа хамгийн их аялсан бэ? Европ тив 2024 онд 747 сая жуулчин хүлээн авч, тэргүүн байр эзэлжээ. Бүс нутагт дайн үргэлжилж байгаа атал энэ тоо үнэхээр гайхашруулж чадсаныг тайланд онцлов.

Европ тив дотроо улс улсаар нь ангилбал, Франц улс 100 сая жуулчин хүлээн авч, дэлхийн дээд амжилт тогтоогоод байна. Парисын зуны олимп, Нотр-Дамын сүмийн нээлт, "D-Day"-ын 80 жилийн ой гэсэн томоохон үйл явдлууд нь жуулчдын Францыг зорих гол шалтгаан болсон юм.

Испани улс 98 сая жуулчин хүлээн авч, хоёрдугаарт оржээ.

Ази, Номхон далайн бүс нутаг 2024 онд 316 сая, Америк тив 213 сая, Ойрхи Дорнод 95 сая, Африк тив 74 сая жуулчин хүлээж авсан байна.