АНУ-ын Батлан хамгаалахын шинэхэн сайдаар "Fox News"-ийн улс төрийн тоймч, хөтлөгч асан Пит Хегсэтийг томилжээ. "Fox News"-ээс гадна түүнийг тодорхойлох дуулиан шуугиан цөөнгүй бий. Тодруулбал, Пит Хегсэт эмэгтэйчүүд байлдааны үүрэг гүйцэтгэх ёсгүй гэх мэт маргаан дагуулсан мэдэгдлүүдийг хийж байв. Мөн бэлгийн хүчирхийлэл, архидан согтууралт гэсэн хэргүүдтэй холбогдож байсан.

Маргаантай зүйлс байсан ч гэлээ АНУ-ын сенат түүнийг Ллойд Остины оронд Батлан хамгаалахын сайдаар батламжиллаа.

Бүгд найрамдах намын зарим сенатор түүнийг нэр дэвшүүлэхийг эсэргүүцэж байв. Энэ нь мэдээж Хегсэтийн өнгөрсөн түүх болон туршлагагүй байдалтай холбоотой аж. Хегсэт сүүлийн хоёр сарын хугацаанд илэрсэн бэлгийн хүчирхийлэл, ажлын байран дахь зүй бус байдлын улмаас шалгагдаж байсан. Трампийн шинэ багаас хамгийн их шалгагдаж байсан хүн бол Хегсэт.

Хегсэтийг хэт барууны үзэлтэй гэдэг. Түүний шивээснүүд дунд хэт барууны болон неонацист бүлгүүдтэй холбоотой дор хаяж хоёр шивээс байдаг аж.

Жо Байдены тангараг өргөх ёслолын үеэр нэг цэргийн албан хаагч түүнийг дотоод аюул заналхийлэл гэж нэрлэсэн байна. Үүнээс болж АНУ-ын арми түүнийг алба хаалгахаас татгалзсан гэж Хегсэт олон нийтэд гомдоллож байсан удаатай.