Украины арми Рязань, Москва зэрэг Оросын 13 бүс нутгийг онилж 121 нисгэгчгүй онгоц хөөргөсөн нь дайны үеийн хамгийн том ажиллагаануудын нэг болоод байна. ОХУ эдгээр 121 нисгэгчгүй онгоцыг бүгдийг нь устгасан гэлээ. Эдгээрийн зургаа нь Москва мужид, 20 нь Рязань мужид, хэд хэд нь хилийн Брянск мужид байна.

Цохилтод Москвагийн зүүн өмнөд хэсэгт орших Рязань мужийн газрын тос боловсруулах үйлдвэр өртжээ. Тус байгууламж нь зургаан км2 талбайг хамардаг бөгөөд галд шатаж буй зураг, бичлэг нь телеграмд нийтлэгдээд байна. Мөн Брянск мужид байрлалтай пуужингийн эд анги болон бусад зэвсэг үйлдвэрлэдэг үйлдвэр өртсөнийг Украины Худал мэдээлэлтэй тэмцэх төвийн дарга Андрей Коваленко мэдээлэв.

Халдлагын улмаас Москвагийн Внуково, Домодедово гэсэн хоёр нисэх онгоцны буудал үйл ажиллагаагаа хэсэг хугацаанд зогсоосон ч эргээд нислэгүүдээ сэргээжээ.

Энэ хооронд Оросын нисгэгчгүй онгоц Киев мужид орон сууцны барилга руу халдсаны улмаас гурван хүн амиа алдаж, нэг хүн шархадсан байна. ОХУ нэг шөнийн дотор 58 нисгэгчгүй онгоц хөөргөснөөс 25-ыг нь устгаж чадсан гэж Украин мэдэгдэв.