АНУ-ын Төрийн департаментаас гадаадад суугаа Элчин сайдын яамдад одоо хэрэгжүүлж буй болон шинээр хэрэгжүүлэх гэж буй бүх тусламжаа зогсоох санамж бичиг илгээсэн талаар "BBC" агентлаг мэдээлэв. Ерөнхийлөгч Трампийн зарлигийн дагуу гадаад бодлогын үр ашиг, уялдаа холбоог шалгах хүртэл гадаадад хэрэгжүүлж буй аливаа тусламжийг 90 хоногийн хугацаатайгаар түр зогсоох болсон байна. Тус улсын засгийн газрын тоо баримтаас харвал, 2023 онд 68 тэрбум ам.долларыг олон улсад хандивлажээ. Төрийн департментын санамж бичигт хөгжлийн тусламжаас эхлээд цэргийн тусламж хүртэл бүх төрөлт хамаарах бололтой.

Гэхдээ энэ нь яаралтай хүнсний тусламж, Израиль, Египетэд үзүүлэх цэргийн санхүүжилтийг хамаарахгүй болохыг "BBC" агентлаг онцлон тэмдэглэв.

АНУ-ын төрийн нарийн бичгийн дарга Марко Рубио өмнө нь Цагаан ордны гаргаж буй бүх зардал Америкийг илүү хүчирхэг, аюулгүй эсвэл илүү баян чинээлэг болсон тохиолдолд л хэрэгжих ёстой гэж хэлж байсан. Энэ талаар Конгрессын харилцааг удирдаж байсан Жош Пол "BBC" агентлагт хэлэхдээ, "Тусламжийг зогсоож буй нь асар том нөлөөг үзүүлнэ. Жишээ нь, дэлхий даяар хүмүүнлэгийн тусламжийн хөтөлбөрүүдийг ажлаа зогсоо гэж хэлбэл маш их сөрөг үр дагавартай" гэсэн байна. Гэхдээ Төрийн департментаас уг зарлигийн дагуу албан ёсны мэдэгдэл гаргаагүй байгаа юм.

 Франс Пресс агентлагийн мэдээлснээр, санхүүжилт царцаах нь Трампийн өмнөх ерөнхийлөгч Жо Байдены үед олон тэрбум ам.долларын зэвсэг хандиваар  авсан Украинд ч нөлөөлж болзошгүй юм.