Орос, Украин Баасан гаригт 806 амиа алдсан цэргийн цогцсыг солилцсон байна. Тодруулбал, Москва 49 цэргийн цогцсыг хүлээн авсан бол Украины тал 451 цогцсыг "Донецкийн ажиллагааны бүс"-ээс гарган авчээ. Энэ нь уул уурхай, тээврийн гол зангилаа болох Покровск хотын ойролцоо болсон ширүүн тулалдааныг илтгэж байна гэж Оросын парламентын гишүүн Шамсаил Саралиев РБК мэдээллийн сайтад мэдэгдэв. Покровск хот нь 60 мянга орчим оршин суугчтай байсан ч хэдэн сар үргэлжилсэн бөмбөгдөлтөд ихээхэн хохирол амссан байдаг. Үүнээс гадна өнгөрсөн наймдугаар сард Курскийн бүс нутагт болсон дайны улмаас нас барсан 34 цэргийн цогцсыг Украин Оросын нутаг дэвсгэр дэх шарил хадгалах газраас гарган авчээ.

Баасан гаригт болсон уг солилцоо нь хоёр орны хооронд өнгөрсөн оны аравдугаар сараас хойших 500 ба үүнээс дээш цэргийн цогцсыг оролцуулсан тав дахь удаагийн солилцох ажиллагаа аж.

Амь үрэгдсэн цэргийн тоо хоёр улсын хувьд төрийн нууц хэвээр байгаа ч Украины ерөнхийлөгч Володимир Зеленский өнгөрсөн сард 2022 оноос хойш Украины 43 мянган цэрэг амиа алдаж, 370 мянга нь шархадсан гэж мэдэгдсэн юм.

Мэргэжилтнүүдийн үзэж байгаагаар бодит тоо илүү өндөр байна. Москвагийн эрх баригчид амиа алдагсдынхаа бодит тоог мэдээлээгүй. Гэхдээ "Mediazona" мэдээллийн вэбсайтаас гаргасан бие даасан мэдээллээр, Оросын 90 мянган цэргийн алба хаагч 2022 оны хоёрдугаар сараас хойш фронтод амиа алджээ.