УИХ-аар төрийн болон орон нутгийн өмчит компанийн засаглалыг сайжруулахтай холбоотой төсөл хэлэлцэгдэж буй. Энэхүү төсөлтэй холбогдуулж, УИХ-ын гишүүн П.Сайнзориг сэтгүүлчдийн асуултад хариулт өглөө.

-Төрийн болон орон нутгийн өмчит компаниуд ашиггүй ажилласан тохиолдолд татан буулгадаг байх зохицуулалттай хуулийн төслийг УИХ хэлэлцэж байна.  Таныг уг төслийн анхны эхийг боловсруулж байсан гэдэг, мэдээлэл өгөхгүй юу?

-Төрийн болон орон нутгийн өмчит компанийн ТУЗ, гүйцэтгэх захирал, засаглалыг ил тод, төсвийн бодлоготойгоо уялдуулж , ашгийг нь ногдол ашгийн зарчмаараа төсөвт өгдөг, Баялгийн санд өгдөг тогтолцоонд оруулахгүй бол улс төрийн санхүүжилт болдог, улс төрийн дарга цэрэгт гүйсэн хүмүүс томилогддог, ямар ч төсөл урагшлуулдаггүй хэрнээ том жип унасан, том тасалгаанд суусан, том дарга нарынхаа хамгаалалтад ороод пээдийсэн хүмүүс л дүүрчихээд байна. Энэ бүгдийг цэгцлэх зүй ёсны шаардлага , цаг хугацаа болсон гэж үзэж байна.

-Төрийн өмчит болон орон нутгийн өмчит компанийг ашиггүй ажиллуулсан байтлаа дараагийн том компанид захирлаар томилогддог. Энэ асуудлыг хязгаарлах боломж байгаа болов уу?

-Төрийн өмчит болон орон нутгийн өмчиткомпанийг ашиггүй ажиллуулах юм бол дахиж төрийн өмчит компанийн удирдлагад томилддоггүй байх хар жагсаалтыг үүсгэнэ.  Учруулсан хохирол нь өөрийн буруутай үйл ажиллагаанаас болсон байвал ярина. Ашиггүй ажиллах гээд байгаа компанийг амь тээж татвар төлөгчдийн мөнгөөр алдагдлыг нь аваад яваад байж болохгүй.

Хувийн хэвшил байсан бол дампуураад хаалгаа бариад Улсын бүртгэлээс хасагдаж байхад дарга нарын хамаарал бүхий нөхөд томилогдсон компани явж л  байдаг.

Бизнесийн үйл ажиллагаа нь ашиггүй байхад л дандаа буруугаа хүн рүү чихнэ. Сүүлдээ энэ компанийг аврах гэж орон тоог нь нэмдэг, төсвөөс мөнгө өгдөг, зээл олгодог.

Төрийн өмчит компани олшрох тусам банкнуудын зээл төрийн өмчит компанид очиж байгаа. Тэр мөнгө хувийн хэвшилд очих юм бол илүү их үржигдэнэ. Төрийн өмчит компани байх тусам хувийн хэвшлийн бизнес хийх орон зай хумигдана.

Эдгээр зүйлүүдийг хумиад ирэх юм бол хувийн хэвшлийн компанид зах зээл нээгдэнэ.  Олон улсын зах зээл дээр гармаар байна шүү дээ.

Бусад посткоммунист орнуудыг хараарай, хөгжсөн орнууд ч гэсэн бодлогоор дэмжиж байж хувийн хэвшлийн аж ахуй нэгжүүдээ олон улсын зах зээл дээр гаргаж ирдэг. Дотоодын зах зээлээ төр нь булаагаад авчихсан байхад яаж олон улсын зах зээл дээр гарч ирэх вэ дээ, манай компаниудын хувьд.

-Төрийн болон орон нутгийн өмчит компанийг хувьчлахаар хамаарал бүхий этгээдүүдийн хамаатан садан аваад ажиллуулбал яах вэ гэдэг асуудал хөндөгдөж байна?

-Тийм зүйл байхгүй. Төслийн анхны эхийг бичсэн хүн бол би. Олон нийтийн хяналтад оруулах буюу хөрөнгийн биржээр дамжуулж бүх ард түмэн ногдол ашиг хүртдэг байх тэр зарчим дээр үндэслэсэн.  Банкинд мөнгө хадгалуулахаас илүү хувьцаа худалдаад авбал зөв байна. Банкнаас мөнгөө татчихаад койнд хийж байна.

Төрийн өмчит компаниудыг хөрөнгийн бирж дээр гаргаад ирвэл хөрөнгийн зах зээлээр дамжуулж орон нутгийн болон төрийн өмчит компанийн хувьцааг аваад урт хугацаандаа хөрөнгө нь эрсдэлгүйгээр арвиждаг бололцоог бүрдүүлье гэж байгаа юм. Хувьцааг нь 34 хувь, 51 хувь хүртэл гаргаж болно. Ингэж үе шаттайгаар зөв гаргана уу гэхээс биш 1990 оны дундуур хийдэг шиг үнэлгээг нь унагааж тухайн компанийг дампууруулж байгаад хувьчлөл нэрээр улс төрийнхөн нь авч болохгүй.

Төрийн өмчийг үнэгүйдүүлж авсан хүмүүс бүгд Төрийн ордон дотор сууж байгаа. Ард түмний хөрөнгөөр баяжсан хүмүүс өнөөдөр улс төрийг залж байгаа, улс төрийн манипуляцыг хийж байгаа.

Тэд нарт дахиж ард түмний өмчийг үнэгүйдүүлж авах бололцоог олгож болохгүй.