Эрүүл мэндийн систем, шим тэжээлтэй хоол хүнс зэрэг хүчин зүйлийн ачаар хүний биеийн ерөнхий хэмжээ сүүлийн 100 жилийн хугацаанд өссөн үзүүлэлттэй гарчээ. Гэхдээ энэ үзүүлэлт эрэгтэй, эмэгтэй хүмүүсийн хувьд харилцан адилгүй байна. "Биологийн захидал" сэтгүүлд Лхагва гаригт нийтлэгдсэн судалгааг харвал эрчүүдийн өндөр, жингийн өсөлт эмэгтэйчүүдийнхээс хоёр дахин илүү байжээ.

Энэхүү судалгааг Итали, АНУ, Их Британийн эрдэмтэд хамтран хийжээ. Тэд 69 улсын 100 мянга гаруй хүний өндөр, жингийн нэгдсэн мэдээллийг ДЭМБ-аас авч судалгаагаа хийсэн байна. Мөн Хүний хөгжлийн индексээс судалгааны материалаа бүрдүүлжээ.

Хүний хөгжлийн индекс нь хүний чадавхийн хөгжлийг харуулах бөгөөд эрүүл саруул байж, урт удаан наслах, эрдэм мэдлэг эзэмших, амьжиргааны зохистой нөхцөлд аж төрөх гэсэн хүний амьдралын үндсэн хэмжигдэхүүнийг илэрхийлнэ. Үүнд:

• Хүний амьдрах (наслах) хугацааг тодорхойлох үзүүлэлтийг төрөлтөөс тооцсон дундаж наслалтаар;
• Боловсролын байдлыг насанд хүрэгчдийн бичиг үсэг тайлагдалт болон бүх шатны боловсролд хамрагдалтын түвшингээр;
• Амьжиргааны зохистой түвшинг нэг хүнд ногдох ДНБ (худалдан авах чадварын паритетаар илэрхийлсэн доллар)-ээр тус тус тооцно.

Тэгвэл өнгөрсөн 100 жилийн хугацаанд хүний хөгжлийн индекс 0.2-оор нэмэгдэх тусам эмэгтэй хүний биеийн өндөр 1.68 см, эрэгтэй хүнийх 4.03 см-ээр өсч байжээ. Харин эмэгтэй хүний дундаж жин 2.70 кг, эрэгтэй хүнийх 6.48 кг-аар нэмэгдэж байжээ.

Дэлхийн банкнаас гаргадаг "Gini" индекс ч энэ мэдээллийг бататгасан. Тус индексийг гаргахдаа 2000-2006 оны хооронд 58 улсын хүмүүсийн биеийн өсөлт хөгжлийг судалжээ.