Чадлын дутагдалд орсон тохиолдолд эрчим хүчний гэнэтийн хязгаарлалтыг зайлшгүй хийхээс өөр сонголтгүй талаар Эрчим хүчний зохицуулах хорооноос мэдээлсэн. Өнгөрсөн жилүүдтэй харьцуулахад эрчим хүчний оргил ачаалал өссөн бөгөөд иргэд хэрэглээгээ хязгаарлахаас өөрөөр тог хэмнэх боломжгүй байгаа аж.

“УБЦТС” ТӨХК-иас өгсөн мэдээллээр, өвлийн их ачаалалтай холбоотой чадлын дутагдалд орсон үед зайлшгүй хязгаарлалт хийж байна. Диспетчерийн үндэсний төвөөс ачааллыг хөнгөлөх шийдвэр өгсний дагуу хязгаарлалт хийж байгаа. Эрчим хүчний систем буюу үйлдвэрлэгчид эрчим хүч нийлүүлж чадахгүй болоод эхлэхээр чадлын дутагдал үүсдэг. Тухайн өдөр хязгаарлалт хийх хуваарийг “УБЦТС” ТӨХК-иас гаргадаггүй. Тиймээс хэрэглэгчдэд урьдчилж мэдээлэх боломжгүй байдаг.  Диспетчерийн үндэсний төвөөс өдөр, өдөрт нь мэдээлсний дагуу хязгаарлалт хийдэг. Тиймээс иргэд, олон нийтэд цахилгаан эрчим хүчээ өдөр тутамдаа хэмнэх зөвлөмжийг өгч байгаа гэсэн юм.

Харин иргэдийн зүгээс урьдчилж мэдэгдэхгүйгээр тодорхойгүй хугацаанд цахилгаан тасалж байгаа нь хүндрэлтэй байгаа төдийгүй үнэ тариф өссөн нь хүндрэл үүсгэх болсныг хэлж байгаа. Үүнд Эрчим хүчний зохицуулах хороо болон "УБЦТС" ТӨХК-иас эрчим хүчний хэрэглээгээ оройн цагаар багасгах болон ухаалаг тоолуурт шилжихийг хэрэглэгчдэд зөвлөж байна.

Тодруулбал, гурван цагийн тарифт тоолуур руу айл өрх шилжсэн тохиолдолд цахилгааны сарын төлбөр одоо гарч байгаагаас багадаа 20 хувиар буурах боломжтой. Хэрэглэгч тоолуураа шилжүүлэх бол "УБЦТС" ТӨХК-ийн 7004-7004 утсанд хүсэлт гаргана.

Тоолуураа шилжүүлснээр өдөр, шөнийн хэрэглээний үнэ аль аль нь буурах боломжтой гэжээ.