Мэргэжлийн сүмогийн Хацү башёгийн түрүү бөх тодрох өдөр улам ойртсоор байна. Башё өндөрлөх дөхөх тусам өрсөлдөөн улам ширүүсч, эзэн хааны цомын төлөөх тэмцэл сонирхолтой болж ирлээ. Өчигдөр/2025.01.23/ башёгийн 12 дахь өдөр тэргүүлэгчид хоорондоо учраа таарчээ.

Башёг ганцаараа тэргүүлж буй Кинбозаны эсрэг энэ башёд түрүүлвэл ёкозүна цол хүртэх Хошорюү С.Бямбасүрэн барилдлаа. Хэрэв Кинбозан энэ барилдаанд ялвал түрүүлэх болзол бараг л хангах байв. Гэвч Хошорюү түүнд боломж олгосонгүй. Хүч тэнцүү хоёр бөхийн тулаанд Хошорюү илүүрхэж, ес дэх даваагаа авчээ. Харин Кинбозан арван даваа, хоёр унаатай болсон аж. Тэдний хооронд ердөө ганцхан унааны зөрүү үүслээ. Магадгүй энэ Ням гаригт, башёгийн сүүлийн өдөр бид нэмэлт барилдаан харахыг үгүйсгэхгүй.

Мөн Киришима Б.Лхагвасүрэн, Такэрүфүжи, Охо нар есөн даваа, гурван унаатай учир түрүү бөхийн тоонд багтаж байна.

Киришима Б.Лхагвасүрэн өчигдөр Охог давжээ. Хэрэв тэрбээр башёгийн эхлэлд тааруу барилдаагүй байсан бол башёг тэргүүлж байх байлаа. Бусад монгол бөхчүүдийн тухайд Ошома П.Дэлгэрбаяр, Тамаваши Б.Мөнх-Оргил нар ээлжит даваагаа авсан бол Тамашохо Э.Энхманлай, Чиёошома Г.Мөнхсайхан нар өвдөг шорооджээ.