УИХ-ын гишүүн Н.Номтойбаяр өнөөдөр мэдээлэл хийх үеэрээ “Ажил хийх санаачлага гаргасныг Засгийн газрын хөнжилд орсон мэтээр мушгин гуйвуулж дайрч давшлаад байх хэрэггүй” гэж мэдэгдлээ.

Энэ тухай тэрбээр “Улаанбаатар хотын утаа, түгжрэлийг шийдэх чиглэлээр ажил хийе гэж санаачлага гаргасныг мушгиж гуйвуулаад Засгийн газарт Үндэсний эвслийн бүрэлдэхүүн орсон юм шиг яриад, мушгиад байна.

Улаанбаатар хотын асуудлыг шийдэх хүрээнд мастер төлөвлөгөө гарч таараа, маш олон эрх зүйн зохицуулалт хөндөгдөнө. Энэ нь УИХ- ын хийх ёстой ажил. Маш олон ажлууд гүйцэтгэх засаглалын хүрээнд хийж таарна. Гол бодлогын хэрэгжилтийг хангахад Үндсэн хуулиар заагласан хэм, хэмжээний чиг үүргийн  хзрээнд  УИХ, Засгийн газар, хотын захиргаа яаж ажиллах вэ л гэж байгаа. Миний бие санаачлага гаргаад УИХ -аас ажлын хэсэг гаргая. Хуучин Түр хороо байгуулдаг байсан. Түр хороо байгуулдаг байсан эрх зүйн зохицуулалт өнгөрсөн парламентаар байхгүй болсон. Зөвхөн хяналт шалгалтын Түр хороо байгуулж болно, тэгэхээр энэ цагдаагийн ажил гэсэн үг. Ийм ажил би хийх нь зохимжгүй.

Тэгэхээр хуульд нийцүүлж ажлын хэсэг гаргаад явъя. Эрх зүйн хүрээнд УИХ юу хийх юм. Явж явж макро эдийн засгийн асуудлынхаа хүрээнд зангилагдана. Нэг талдаа орон сууцжуулах хөтөлбөрийг яаж дэмжих вэ, өртөг зардлыг яаж буурулах вэ, нөгөө талдаа  орон сууц худалдан авагч иргэдийн орлогыг яаж нэмэгдүүлэх вэ зардлыг яаж бууруулах вэ, энэнтэй холбоотой маш олон эрх зүйн зохицуулалт байгаа. Ийм л томъёоллын хүрээнд явж байгаа.

Улаанбаатар хотоор хязгаарлахгүй аймгууд ч асуудалтай байгаа. УИХ-д суудалтай намууд улстөржилтөө энэ асуудалд оруулахгүй байя, гар нийлээд ажиллая гэхээр гуйвуулж мушгиад хөнжилд нь орлоо гэж дайрч давшлаад байх шаардлагагүй” гэлээ.

Г.ХОРОЛ