ОХУ-ын Курск мужийн оршин суугчид өнгөрсөн наймдугаар сард болсон Украины довтолгооны үеэр холбоо тасарсан төрөл төрөгсдөө хайх хөдөлгөөн эхлүүлээд байна. Тодруулбал, Украин Курск мужид явуулсан довтолгооныхоо хүрээнд хэд хэдэн жижиг хот, тосгоныг эзэлсэн. Улмаар эрх баригчид иргэдээ хамгаалж, тэдэнд нөхцөл байдлын талаар хангалттай мэдээлээгүй гэж Курск мужийн бусад оршин суугчид үзэж байна.  Тухайлбал, тус мужийн Суджад 3 мянга орчим хүн гацсан хэвээр байгаа гэж үзэж байна. Тэдний төрөл төрөгсөд олон нийтийн цахим сүлжээгээр Орос, Украины засгийн газар болон олон улсын байгууллагуудаас тусламж хүсчээ.

Тэд "#YaMySudzha" (I Am/We Are Sudzha) хэштег ашиглан мэдээлэл түгээж байна.

Уг ажлыг удирдаж буй хүмүүсийн нэг бол өндөр настай эцэг эхээ олох гэж хэдэн сарын турш хичээж буй Любовь Прилуцкая юм. Тэрбээр сэтгүүлчдэд хэлэхдээ, "Эрх баригчдын гаргасан ор сураггүй алга болсон, нас барсан гэх нэрс худал байгаа тул цахим сүлжээг ашиглан бодит үнэнийг хайхаас өөр аргагүй" гэсэн юм.

Өнгөрсөн Бямба гаригт нутгийн олон арван оршин суугчид ойр дотнын хүмүүсээ эргүүлэн авчрах, тулалдааны улмаас дүрвэсэн хүмүүсийн нөхцөл байдлыг сайжруулах арга хэмжээ авахыг шаардаж, мужийн захирагчийг эсэргүүцэн жагсчээ.

Үүний зэрэгцээ Украины тал 2022 оны хоёрдугаар сараас хойш Оросын зэвсэгт хүчинд олзлогдсон иргэд нь одоог хүртэл сураггүй байна гэж мэдэгдэв. Мөн Оросын иргэдэд Курск мужаар аюулгүй орж, гарах боломжийг олгож байгаа гэв. Гэсэн хэдий ч одоог хүртэл "#YaMySudzha" цахим хөдөлгөөний тусламжтайгаар нэг ч хүн олдоогүй байгаа аж.

Украины Курск дэх довтолгоо 2024 оны наймдугаар сарын 6-нд эхэлсэн бөгөөд эхэндээ хурдацтай ахиц дэвшил гаргаж байсан. Гэвч Орос улс нэмэлт хүч, тэр дундаа Хойд Солонгосоос цэргээ илгээсний дараа удааширсан байдаг.