Хойд Солонгосын 12 мянга орчим цэрэг Оросын армитай нэгдэн Украинд тулалдаж байгаа билээ. Тэгвэл Оросын талд байлдаж байгаад Украины армид олзлогдсон цэргүүдийг нутагт нь буцаахгүй байхыг Хойд Солонгосын хүний эрхийн бүлгүүд хүсч байна. Тэд энэхүү хүсэлтээ захидал хэлбэрээр Украины ерөнхийлөгч Зеленскийд хүргүүлжээ.

Украины ерөнхийлөгч Зеленский сүүлийн долоо хоногийн хугацаанд олзлогдсон хойд солонгос цэргүүдийг байцааж буй хэд хэдэн бичлэгийг цахим орчинд нийтэлсэн. Олзны хоёр цэргийн нэг нь Украинд үлдэх хүсэлтэй байгаагаа илэрхийлсэн юм. Харин Зеленский Орост олзлогдсон украинчуудын оронд хойд солонгос цэргүүдийг хүлээлгэн өгөхөд бэлэн гэжээ.

Үүний дараа Хойд Солонгосын хүний ​​эрхийн төлөөх иргэдийн холбоо болон "Мулмангчо" зэрэг хүний эрхийн хэд хэдэн байгууллага нэгдэж, уг захидалд гарын үсэг зурсан байна. Захидалд Зеленскийг цэргүүдийн хувийн мэдээллийг задруулахгүй байхыг хүсчээ. Мөн хүсэл зоригийнх нь эсрэг Орос, Хойд Солонгос руу буцаахгүй байхыг уриалсан байна.

Орос болон Хойд Солонгосын зүгээс тэдгээр цэргийн эсрэг аливаа харгислал үйлдсэн бол түүнийг нь нотлох баримт цуглуулахыг хүний эрхийн бүлгүүд Украинаас хүсч байна.

Тэд захидалдаа Женевийн конвенцийн тайлбарыг эш татжээ. Тус конвенцид "Дайнд олзлогдогчдыг эх оронд нь буцаах нь ард түмнийг хамгаалах олон улсын хуулийг илт зөрчиж байгаа бол олзлогч тал тэдэнд орогнол олгохыг зөвшөөрч болно" гэж заасан байдаг. Дайсандаа баригдаж, бууж өгсөн хойд солонгос цэргүүд нутагтаа эргэн очвол урвагчид тооцогдон, хатуу шийтгэл хүлээх магадлалтай.