Сирийн шинэ засгийн газар Газар дундын тэнгис дэх цэргийн баазыг Орост ашиглуулах гэрээг цуцалсан тухайгаа Мягмар гаригт мэдэгдэв. Уг баазыг Башар Аль-Ассад ерөнхийлөгч байх үедээ 49 жилийн хугацаанд Путинд ашиглах зөвшөөрлийг олгож байсан юм. 2017 онд байгуулсан гэрээ нь Сирийн Тартус боомтыг Орос ашиглах боломжийг олгож байсан. Гэвч өнгөрсөн сард Ассад эх орноосоо дүрвэсний дараа уг боомт цаашид хэрхэх нь тодорхойгүй байсан юм.

Босогчдоос бүрдсэн де-факто засгийн газар гэрээг цуцалсныхаа хүрээнд баазад үлдсэн орос цэргүүдийг нэн даруй Сириэс гарахыг шаардсан байна.

Үүнээс гадна, Тартус боомтоос орж ирэх орлогын 65 хувийг Орос авдаг байсан нь тогтоогджээ. Тиймээс цаашид үүнийг хориглох болсноо мэдэгдэв. Тус улсын эх сурвалжийн мэдээлснээр, Оростой байгуулсан гэрээг цуцалснаар улсын эдийн засагт үзүүлэх нөлөөг судлах ажлыг засгийн газар эхлүүлсэн. Гэхдээ ямар ч тохиолдолд боомтоор орж ирэх ашиг, орлого зөвхөн Сирид зарцуулагдах болно гэж засгийн газраас мэдэгдсэн талаар онцолжээ.

Тартус боомтийн гэрээг цуцалсан явдалд Кремлийн удирдлага хариу мэдэгдэл хийгээгүй байгаа аж. Гэхдээ өнгөрсөн Ням гаригт Сирийн шинэ засгийн газар Орос, Иран, Израилийн импортод хориг тавьсан тухайгаа мэдэгдсэн тул тун удахгүй Путин хариу мэдэгдэл гаргана гэж ажиглагчид үзэж байна.