Израилийн армийн командлагч, дэслэгч генерал Херзи Халеви 2023 оны аравдугаар сарын 7-ны халдлагын хариуцлагыг хүлээж, огцорч буйгаа мэдэгдлээ. Тэрбээр Батлан хамгаалахын сайдад илгээсэн захидалдаа "Израилийн Батлан хамгаалах хүчин иргэдийг хамгаалах үүргээ биелүүлж чадсангүй. Аймшигт бүтэлгүйтлийн төлөөх хариуцлага намайг цаг хором бүрт дагасан. Цаашид ч амьдралын минь туршид ийм байх болно. Израилийн дайны зорилго бүгд биелээгүй. Израилийн арми Хамас бүлэглэл болон түүний удирдлагын чадавхийг цаашид устгаж, барьцааны хүмүүсийг эргүүлэн авчрахын тулд тэмцлээ үргэлжлүүлнэ. Мөн зэвсэгт бүлэглэлийн дайралтаас болж дүрвэсэн израильчуудад эх орондоо буцаж ирэх боломж олгоно" гэжээ.

Херзи Халевигийн мэдэгдлийн дараа Израилийн армийн өмнөд командлалын дарга, хошууч генерал Ярон Финкельман мөн огцорч буйгаа мэдэгдлээ.

Газын зурваст гал зогсоох хэлэлцээрийг байгуулснаас хойш гурав хоногийн дараа ийнхүү Израилийн цэргийн удирдлагууд огцров. Израилийн ерөнхий сайд Беньямин Нетаньяху армийн командлагч Херзи Халевигийн олон жилийн хүчин зүтгэлд талархал илэрхийлээд, энэ нь Израилийг томоохон амжилтад хүргэсэн гэжээ.

Сөрөг хүчний удирдагч Яир Лапид армийн командлагчийн огцрох шийдвэрийг өндрөөр үнэлсэн байна. Тэрбээр "Одоо тэд хариуцлага хүлээж, ерөнхий сайд болон түүний сүйрлийн засгийн газрыг бүхэлд нь огцруулах цаг болсон" гэжээ.

2023 оны аравдугаар сарын 7-ноос ч өмнө Хамасын зэвсэгт этгээдүүдэд халдлага үйлдэх шинж тэмдэг илэрч байжээ. Гэвч энэхүү шинж тэмдэг, анхааруулгыг Израилийн цэрэг, тагнуулынхан үл тоомсорлосон гэж үздэг. Ийнхүү Газын зурвасын дайн эхэлснээр 47100 гаруй палестин хүн амь үрэгдээд байна.