Мэргэжлийн сүмогийн Хацү башё тун сонирхолтой үргэлжилж байна. Өчигдөр/2025.01.21/ башёгийн арав дахь өдрийн барилдаанууд боллоо. Нэг ч унаагүй, есөн даваатай бөхчүүдийг тэргүүлж байсан Кинбозан комүсүби Абид өвдөг шороодож, энэ оны анхны ялагдлаа амсав. Ингэснээр түүний араас нэхэж байсан бөхчүүдэд гүйцэх сайхан боломж гарч ирсэн.

Дараалан ялагдаж, дэмжигчдээ гонсойлгосон озэки Хошорюү С.Бямбасүрэн өчигдөр сэкивакэ Дайэйшог давж, долоон даваа, гурван унаатай боллоо. Ийнхүү тэрбээр эргэн түрүү бөхийн ярианд орж ирэв. Хэрэв Хошорюү энэ удаагийн башёд түрүүлвэл ёкозүна цол хүртэх учиртай.

Башёг тэргүүлж буй монгол бөхчүүд өчигдөр учраа таарсан. Чиёошома Г.Мөнхсайхан болон Киришима Б.Лхагвасүрэн нарын барилдаанд Киришима илүүрхэж, долоо дахь даваагаа авав. Харин Чиёошома найман даваа, хоёр унаатай болжээ.

Мэргэжлийн сүмод олон жил тогтвортой барилдаж буй Тамаваши Б.Мөнх-Оргил өчигдөр Оход унаж, зургаан даваа, дөрвөн унаатай болов. Энэ жил 41 нас хүрэх тэрбээр анх 2008 онд дээд зиндаанд дэвшиж, түүнээс хойш 2019 оны Хацү, 2002 оны Аки башёд тус тус түрүүлсэн түүхтэй.