Оросын түрэмгийлэл эхэлснээс хойш хууль бусаар баяжсан хэргээр Украины армийн ахлах сэтгэл зүйчийг саатуулжээ. Энэ хугацаанд тэр нэг сая ам.доллар хуримтлуулжээ. Үүнээс гадна Киев хотын ойр орчимд гурван орон сууц, Одессад нэг орон сууц, хоёр газар, хэд хэдэн “BMW” машин эзэмшдэг. Мөрдөн байцаагчид түүний гэрт нэгжлэг хийхэд 152 мянган ам.доллар бэлнээр олджээ. Эдгээр эд хөрөнгө нь түүний эхнэр, охин, хөвгүүд болон бусад гуравдагч этгээдийн нэр дээр бүртгэлтэй байсан гэлээ.

Аюулгүй байдлын алба тухайн хүний нэрийг дурдаагүй боловч өмнө нь Олех Друз гэгч хүн Украины Зэвсэгт хүчний ерөнхий сэтгэл зүйчээр ажиллаж байв. Мөн түүнийг цэргийн албанд тэнцэх эсэхийг шийдэх комисст суудаг гэжээ.

Хууль бусаар хөрөнгөжсөн, худал мэдүүлэг өгсөн гэх хэргээр Олех Друз 10 жилийн хорих ял авч магадгүй.

Друз 2017 онд мөн ижил төстэй хэрэгт холбогдож байжээ. Тухайн үед тэрбээр хоёр жийп машин болон хэд хэдэн эд хөрөнгөө мэдүүлээгүйн улмаас албан тушаалаасаа салж байв.

Украин удаан хугацааны турш улс орон даяар тархсан авлигатай тэмцэж байна. Энэхүү хүчин чармайлтын хүрээнд авлигын хэрэгт холбогдсон 30 гаруй цэргийн албан хаагчийг 2023 онд ажлаас нь халжээ.