Өмнөд Солонгосын зоогийн газар, хүргэлтийн хоолны бизнес эрхлэгчид бүтээгдэхүүний хэмжээгээ багасгаж эхэлжээ. Энэ нь ганцаараа хооллох хүмүүсийн тоо өсч буйтай холбоотой. Цаашилбал, ганц хүнтэй өрхүүдийн тоо Өмнөд Солонгост өсч буйтай холбогдоно.

Шинэ зах зээлд зориулж бизнес эрхлэгчид "YONO" буюу  "you only need for one" гэх чиг хандлагыг эхлүүлжээ. Энэ нь "Танд ганц л байхад хангалттай" гэсэн утгатай. Шинэ чиг хандлагын хүрээнд хоолны хэмжээ болон үнийг мэдэгдэхүйцээр бууруулж байна. Тухайлбал, "Kyochon F&B" ресторан өнгөрсөн долоо хоногт "Single Series" цэсээ гаргажээ. Шарсан тахианы бусад ресторанууд ч ганцаараа үйлчлүүлж буй хүмүүст зориулж шинэ цэс танилцуулсаар байна.

Солонгос хоолны газруудаас гадна "Domino’s Pizza", "Pizza Hut", "Papa Johns" ч шинэ чиг хандлагад нэгдэж, 5-7 мянга хүртэлх воны м үнээр жижиг хэмжээтэй бүтээгдэхүүнээ гаргаж эхэлжээ.

Дашрамд дурдахад, Өмнөд Солонгост 2023 онд ганцаараа амьдардаг хүмүүсийн тоо 7.82 сая давж, нийт өрхийн 35.5 хувийг эзэлж байна. Энэ нь түүхэн дээд үзүүлэлт гэдгийг статистикаас харж болно. 2022 онд ганцаараа амьдардаг хүмүүсийн тоо 7.38 сая гаруй байжээ.