Оросын хөлбөмбөгийн холбооны зүгээс шигшээ багийнхаа 2025 онд хийх нөхөрсөг тоглолтуудын хуваарийг танилцуулжээ. Тэд ирэх хавар болон намар Ази, Африкаар аялан тоглох аж.

Одоогоор Оросын хөлбөмбөгийн шигшээ багийн эсрэг тоглох багууд тодроогүй байгаа ч Азийн тоглолтуудаа гуравдугаар сарын 21 болон 25-ны өдрүүдэд хийхээр товложээ. Харин Африкийн тоглолтуудаа арваннэгдүгээр сарын 14 болон 18-ны өдрүүдэд хийх гэнэ.

Оросын хөлбөмбөгийн шигшээ баг энэ жил нийт арван нөхөрсөг тоглолт хийх бөгөөд наймыг нь эх орондоо хийх товтой.

Өнгөрсөн жил Оросын шигшээ баг нийт таван нөхөрсөг тоглолт хийснээс гурвыг нь эх орондоо хүлээн авсан. Тэд Серби, Беларусь, Вьетнам, Бруней, Сиритэй тоглож, бүгдийг нь хожсон билээ.

Уг нь Тайландын эсрэг Вьетнамд тоглох байсан ч цаг агаарын таагүй байдлын улмаас цуцалсан юм.

FIFA буюу Олон улсын хөлбөмбөгийн холбоо 2022 онд Оросын хөлбөмбөгийн шигшээ баг болон тус улсын клубуудыг FIFA-ийн тэмцээнүүдэд оролцохыг нь хориглосон. Европын хөлбөмбөгийн холбоо ч адилхан арга хэмжээг авсан түүхтэй.